復活節假期尋日結束，外遊嘅名人紛紛返港，除咗立法會旅遊界代表謝偉俊與白姐姐去完澳洲悉尼外，機場入境大堂仲出現一個地產界大孖沙，佢就係新鴻基地產副主席郭炳江。泰國局勢漸趨惡化，大批記者駐守機場，準備訪問由泰國返港嘅旅客，但大約在下午茶時間就見到郭炳江與一名助手步出禁區，佢嘅行李都算幾輕便，但高爾夫球用具就特別多。
郭炳江尋日一身便服步出機場禁區，佢着咗件Polo恤再加西裝褸，特別嘅係佢戴咗一副眼鏡。問佢係咪去完泰國度假？佢只係肯回應話剛去完新加坡，然後就同助手急步離開機場嘞！雖然郭炳江無講究竟今次係度假抑或傾生意，亦無提及去新加坡邊一度地方，但新加坡嘅星級度假地點離不開Sentosa（聖淘沙），部分度假村都設有偌大花園及極具規模嘅高爾夫球場，仲有好完善嘅設備添。