為爭取喺大磡村、即係沙中線港鐵車廠塊「吉地」搞電影園，前立法會議員陳婉嫻追瘦運輸及房屋局局長鄭汝樺同港鐵講數，收窄車廠範圍，最近去招呼嫻姐嘅，係副局長邱誠武。
嫻姐同班戰友嘅來意，擺明車馬係要港鐵讓地，邱副局長搵埋港鐵嘅專家嚟講吓港鐵嘅諗法，點知港鐵方面嘅用地唔單止冇得減，仲話要用晒成幅地，要擺足十七架列車，要起三層停車場，外牆仲有成二百米咁高。
嫻姐當堂愈聽愈火滾，港鐵可以提出佢哋嘅諗法，但係邱副作為官員，應該企喺市民嘅一邊，考慮市民嘅利益。沙中線嘅港鐵車廠附近就係采頤花園，根據政府同港鐵嘅諗法，啲居民對住多層車廠，開窗就只會不見天日，只係對住幅牆，仲有深夜到清晨，港鐵出入車廠嘅噪音。
班問責高官口口聲聲話會貼近民情，點解連咁擾民嘅事都諗得出？喺當日嘅會上，邱副畀嫻姐鬧到頭耷耷，乜都唔識答。有區議員得知有啲咁嘅擾民舉動，準備落區開居民大會，跟住搞簽名運動，邱副局長小心件事可能爆大鑊，隨時火燒身！