由長實主席李嘉誠捐款興建嘅大埔洞梓山巨型觀音像今年一月中上馬動工後，工程一直備受矚目，篤信佛理嘅誠哥表弟莊學山透露，近日正全力動工興建，佛像造工亦已作公開招標，誠徵有造巨像經驗人士投標，共同完成呢項興建全球第二高觀音像的創舉。
潮屬社團總會永遠名譽主席莊學山日前出席潮州商會晚宴，講起佛像幾時落成，佢報喜話工人正打緊地基，佛像初模亦已完成，近日公開招標徵集有承造佛像經驗嘅人，將個初模放大成七十六米高、相當於二十三層樓高嘅觀音銅像。任何人只要有興建巨型佛像經驗都可以參與投標，承建公司係內地背景抑或係香港公司都冇緊要，最重要係起得好喎。
據聞整個計劃將耗資逾億元，佛像造價絕對唔嘢小，金融海嘯下有咁大單工程招標，都算係振奮人心。莊主席話，依家未知觀音像幾時完工，總之愈快愈好。問佢點睇香港幾時走出經濟困境，佢話冇咁快，起碼要等到明年中至會復甦，不過佢相信港人咁拚搏勤奮，一定會捱過呢關喎。