中華總商會前會長霍震寰衣着品味一向低調，不過講到用行李篋同公事包，就似乎對美國總統奧巴馬用緊嘅牌子好有興趣，唔通佢想買番個防彈公事包做擋箭牌？
前日假期，霍震寰一支公現身中環Shopping，佢自得其樂行咗入太子大廈嘅TUMI巡視好耐，尤其細心揀旅行篋，問佢係咪諗住買篋外遊，霍生話：「咁啱行過啫，不過每個月都會遠行一次嘅。」佢話，因為復活節假冇外遊，特別得閒，所以行街消磨吓時間，不過佢睇完一輪行李篋後都係唔多啱心水，時間啱啱好，佢跟住就去咗附近一間酒店飲下午茶。
霍震寰細心研究嘅TUMI係一個美國牌子，來頭認真唔簡單，每款袋由數千至兩萬幾銀不等，有圖為證，奧巴馬就最鍾意拎住個價值兩萬幾蚊港紙嘅黑色真皮TUMI出入白宮。荷里活紅人湯告魯斯就鍾情同款嘅防彈尼龍公事包，唔知係咪貪佢夠硬淨，一個唔好彩遇襲都擋得到兩嘢呢？霍生話晒係富豪二代，拎住個防彈袋行街，點計都安心好多！