本文重點
立法會將於下個星期三表決預算案，曾氏兄弟煲呔曾同鬍鬚曾至今仍相當口硬，拒絕應外界要求提早加碼紓困，似乎對預算案順利通過胸有成竹，但原來私底下係另一回事。據聞鬍鬚曾最近已將佢預算案寫手嘅任期延長兩個月，其中一個說法正係擔心預算案無法如期通過。唔通佢暗地裏已經對下周三喺立法會嘅表決打定輸數，準備再嘥多啲公帑同立法會打番場持久戰？
為咗協助財政司司長編製預算案，政府每年都會調派一名首席助理秘書長到庫務科充當預算案寫手，任期一般喺每年嘅四月底、即立法會通過預算案完結。今年出任呢個臨時職位嘅，係之前做過民政署助理署長夏鎂錤。不過我哋最近收到消息，指政府已經偷偷哋將呢個位嘅任期延至六月底，連帶轄下嘅支援人員亦被迫要再坐一會，不但嘥多唔少公帑，仲變相阻住其他人調職同升職。
今次預算案寫手獲破例延任，其中一個說法係政府內部評估預算案可能無法如期通過，需要預留人手改寫甚至重寫預算案。根據《基本法》第五十一條，如果立法會拒絕通過預算案，政府同立法會經協商後仍未能取得一致意見，特首就可以解散立法會。即係話只要大家之後傾得掂數，政府仍可向現任立法會提出新一份經修改嘅預算案，唔係一定要立即解散立法會。
雖然《基本法》並冇寫明呢段協商期最長可以幾耐，但一般估計最多只可拖兩至三個月，否則全港十幾萬公務員可能會齊齊冇糧出。依家政府只將呢位預算案寫手延任兩個月，正好顯示即使預算案被否決，政府都唔想咁快解散立法會，希望喺兩個月嘅協商期內，同立法會四四六六拆掂佢。
雙曾拒加碼派糖
不過亦有分析指出，雙曾講過會喺年中評估過最新嘅經濟形勢後，推出新一輪紓困措施，今次延任可能純粹係為呢份小型預算案做準備。無論點都好，有關安排都顯示雙曾喺預算案表決前會繼續寸步不讓，堅拒立即加碼派糖。
最抵死係鬍鬚曾尋日仲得閒喺佢嘅官方網誌度，大談佢早前用公帑外訪時嘅所見所閒同乜嘢叫做「薄膜光伏電」，隻字不提預算案同市民喺金融海嘯下嘅慘況，真係唔知應該話佢處變不驚定係麻木不仁好！