復活節沙田跑馬，名人紛紛入場湊熱鬧，卓妮就遇到已退休嘅五屆冠軍練馬師「食力簡」簡炳墀，佢話同馬會好有感情，仔女都係飲馬會水大嘅，所以要定期返「娘家」同各方好友飲杯茶、吹吓水。簡Sir把口出名夠辣，早前建議炒晒啲庸官後，尋日又「愛之深、責之切」，鬧啲堅持外遊泰國嘅港人唔識死，萬一出事又要政府執手尾。
踩政府愈鬧愈衰
簡Sir話，泰國局勢混亂，唔應該再去當地旅遊，否則出咗事就要搵人去救，救唔到又鬧政府唔幫手，依家政府已經夠衰啦，愈鬧就愈衰。港府點衰法呢？「總之係衰啦！」簡Sir意猶未盡，話香港新一代唔捱得，以前佢嗰代就算無飯開都唔敢問政府攞，相反依家郁吓都要政府派錢，又下下攤大手板問阿爺（中央）攞，咁嘅心態，想唔畀上海追上都好難嘞！
出入馬場靠襟章
雖然馬會好多人都認得簡Sir個嘜頭，但馬會有規有矩，出入總要通行證，簡Sir於是依靠一個藍色馬會襟章做識認，佢話個襟章在退休時由當時嘅馬會行政總裁黃至剛頒畀佢，係身份象徵，戴上襟章在馬場內周圍去都得。不過，卓妮咁啱又遇到黃至剛入場探朋友，佢話已經忘記幾時頒襟章畀簡Sir，但就算無襟章都好，因為佢係簡炳墀，橫行馬場都得。
卓妮無見黃至剛一排，見佢隻右腳行起路時唔係咁順暢，原來佢早前整傷右腳膝關節嘅半月板，行路時感到極大痛楚，已進行手術治療，現正處於康復階段，最少要一個月後才能繼續到跑馬地馬會做健身運動，希望佢多加保重啦！
剛獲委任為青年事務委員會主席嘅觀塘區議會主席陳振彬（Bunny），名下新馬「傳奇快車」尋日首次出賽，可惜搏到盡只得第三名，但Bunny已經感到好滿意。講起泰國局勢動盪，原來Bunny一家在紅衫軍請願前一星期都去過泰國度假，玩得好開心，於是大嘆好彩。
卓妮