呢嗱，世事往往就係咁詼諧，有人肯送出樟木古董屋，唔係一間，而係七間，對方竟然唔肯要。邊個傻瓜蠢得咁交關？答案係，香港特區政府。
國際巨星成龍手頭上就有七間價值連城嘅樟木古董屋，另外亦有一個涼亭以及一個戲棚。本來，成龍係諗住送畀港府嘅，用嚟興建「成龍博物館」，一來可以保存貴重文物，二來可以作為香港景點，吸引遊客吖嘛。點不知，呢個特區政府唔知係咪打咗懵仔針，十年嘞，成件事拖拖拉拉傾咗十年，官員嘅態度始終係愛理不理，一味話搵地方安置有困難。
傻瓜唔肯收禮物吖嘛，新加坡就醒目嘞，一於冷手執個熱煎堆，向成龍拍心口保證，要地有地，要錢有錢，要人有人。新加坡負責運送所有古董文物，再喺樟宜一間新大學裏面興建博物館好好安置！
唉，有時中華民族就係咁奇怪，寶物流失海外，一話拍賣啫，個個熱血沸騰鬼殺咁嘈，點都要千方百計將寶物接返屋企；寶物如果留喺自己地頭，咁就闊佬懶理㗎喇，送都冇人要。特區政府嘅組成部分當然係中華民族啦，所以離唔開醜陋中國人嘅劣根性。
好嘞，早兩個月當成龍話等得唔耐煩，要將古董屋送畀新加坡，即係寶物流失海外啦，做事一向慢過烏龜嘅港府忽然又變得非常肉緊，即刻由旅發局出面要求成龍回心轉意，極力挽留咁話喎。
唉，又難怪成龍大哥覺得冇癮嘅。就好似一男一女，男方不斷向女方示愛，話準備咗一份大禮，女方一味扭扭擰擰，態度高高竇竇，十足十扮上菜自以為鑲鑽石嘅港女，硬係唔肯收禮物。示愛示足十年，港女依然故我，男方梗係氣餒啦，索性將禮物送畀另一個女仔。吖，一見有人爭，港女終於滴汗，掉轉頭乞求男方唔好移情別戀。
話時話，成龍都算唔話得，淨係答應向新加坡送出三間古董屋，手上仲有四間「靜候佳音」，即係繼續等香港政府作出正面回應。計功夫茶話齋，港府唔好再做港女，扭扭擰擰好討厭㗎，快快趣趣搵地方安置四間古董屋啦，千祈咪再走寶！
講開又講，搵地方安置成龍古董真係咁難咩？西九文娛區一大片荒地，加個博物館易過借火。如果真係有決心，乜嘢困難都可以克服嘅，譬如話，特區政府講過，香港想窮都難，結果係點？真係利用金融海嘯乘機克服困難囉，香港窮畀你睇！