陳淑莊（Tanya）呢排飛不停，去完日本無耐，又代表香港去澳洲參加一個國際青年領袖計劃，前兩日先落機。可能Tanya怕冷落男友，前日陪完男友睇戲，尋日又再齊齊入長洲食海鮮。
Tanya講過同男友都係由食結緣，男友仲讚佢食魚時好似隻貓咁，可見Tanya幾咁鍾意食魚，不過Tanya就曾經畀娃娃魚嚇親。話說Tanya六、七年前同朋友去澳門一間酒樓食飯時，聽到有小朋友「嘩、嘩」聲咁喊，但全間酒樓只得佢哋一枱客，Tanya仲以為自己幻聽。Tanya走去問伙記，點知佢拎咗兩條娃娃魚出嚟，原來啲聲音係娃娃魚被劏時發出，Tanya真係大開眼界。查實娃娃魚喺地球存活咗三億年，曾經與恐龍並存，目前係國家第二級保護動物，當然係唔應該食喇。
講番澳洲之旅，Tanya話今次去咗成三個城市，其中一日去咗悉尼嘅賽馬場，聞說女士都戴帽入場，佢都戴咗朵花喺頭上頂檔，點知佢入到場，見到女士們啲帽都又高又靚，佢就決定疊埋心水，好好欣賞大家嘅精心打扮仲好喎。