又到復活節，唔少議員都會趁呢個機會出外遊埠輕鬆吓，就好似批發及零售界嘅方剛咁，近期為咗膠袋稅、食物回收法同民間消費券忙到一頭煙，所以趁復活節假期同太太去泰國玩四日。最近泰國政局再度不穩，前總理他信嘅支持者唔止喺曼谷示威，仲闖入芭堤雅嘅東盟峰會嘅新聞中心大肆破壞，搞到阿披實政府尋日要取消峰會，連出席峰會嘅國務院總理溫家寶都要提早回國。唔知身在泰國嘅方剛有無受牽連？
尋日我哋終於搵到身在泰國嘅方剛，佢喺電話度報平安，話今次主要係去泰國打高爾夫球，全程留喺清邁。方剛都有睇新聞，知道芭堤雅有事，但佢身處嘅清邁就非常安全，「完全感覺唔到有咩事」，叫大家唔使為佢擔心。方剛仲話唔會縮短行程，因為依家好多人趕住走，改咗仲煩，佢會依照原定行程，下星期一由曼谷轉機返香港。
講番打波，方剛話清邁嗰邊好熱、自己又懶，日日瞓到好晏先起身打波，搞到打親波都曬得好緊要。方剛自己不時都去清邁打波，佢都覺得今次個高爾夫球場「吉」過上次，可能係受上次政變影響。代表零售界嘅方剛批評今次事件顯示泰國政府無能，連外國政要都保護唔到，肯定對經濟同市道有好大影響，果然三句不離本行！