政情：工聯會教人抗海嘯

KK或留港投預算案

KK話，金融海嘯下唔敢縮減畀太太嘅家用，惟有慳自己，用罐頭菜脯送潮州粥，聽落似乎有啲口寡，原來佢當年行船時，經常食呢味餸喎，上船例牌帶幾罐菜脯。問佢廿二日預算案投票日係咪依原定計劃，飛去澳洲出席囝囝畢業禮？KK突然轉口風，話如果投票情況嚴峻，唔係冇得傾嘅。言下之意，有可能撇低老婆阿仔，留港把關都未定。

嫻姐提議行山減壓

嫻姐亦係慳妹一名，最愛食豆豉鯪魚炒油麥菜。講起抗海嘯良方，佢提議大家行山減壓，強身健體之餘仲唔使花一毫子。嫻姐又自爆近日不斷增值，皆因「煲冬瓜」一向水皮，早前上海復旦大學請佢去講課都唔敢應約，不過今年兩會期間佢要喺領導人面前發言，於是秘密練兵幾個月，搵咗個義務老師矯正發音，又捉埋家人、朋友甚至政協委員老友練習，日子有功下已經見得吓人。下次再有內地大學請佢開金口，一定唔會再推喎！