全國政協委員蔣麗芸（Ann）除咗搞政黨工作，自己都係生意人，有時都要周圍飛去傾生意。早兩日喺個活動見到佢，問起嚟緊復活節有咩活動，阿Ann就話，佢今年復活節無時間去玩，反而會上北京同四川。原來佢個黨搞咗個工商專業培訓班，帶一班工商界嘅黨友去北京嘅國家行政學院上堂，學吓國際政治、經濟形勢等，依家已經出咗發，阿Ann就會參與其中兩日嘅活動。阿Ann去完北京，就會過四川，帶一班有心人去災區睇吓重建情況。
四月復活節忙個不停手，不過，阿Ann五月中旬就會同一班朋友去台灣嚟個夏日溫泉之旅輕鬆吓，一行約十人，包括全國政協盧文端同太太，仲有一啲商界嘅朋友。
阿Ann嘅朋友同佢推介台灣啲溫泉好正，當地又出名美食多，不如大家去台灣玩吓；阿Ann就話，去日本浸溫泉就試得多，無理由唔去試吓台灣溫泉，諗落都覺得係好主意，一於叫埋老公齊齊去歎番吓。