本文重點
風水話桃花旺，好就利人緣，壞嘅可能係劫。年屆五十歲、男人魅力沒法擋嘅立法會旅遊界超人謝偉俊（Paul），近期桃花超旺盛，傳出有青島美少女主動介入做第三者，但紅顏知己「白姐姐」白韻琴以迅雷不及掩耳攔截敵方導彈，搞到阿Paul要頻頻接招，為咗趕去接白姐姐去澳洲度假，惟有在立法會停車場違規泊車，結果畀秘書處出警告信。
立法會秘書處規定每個議員同一時間只准停泊一部車輛喺停車場，但我哋前日就發現阿Paul停泊咗兩部老爺跑車喺度，分別係八一年Benz及桃紅色保時捷911Carrera Rs，仲吸引幾個外傭坐在車頭上拍照。
秘書處隨即發出警告信，提醒佢要遵守規則，同一時間只能夠泊一部車！直到尋日，兩架車仲泊喺停車場內，但夾在保時捷擋風玻璃上嘅警告信已經唔見咗。
話說青島美少女曝光後，白姐姐本周三會見傳媒反擊，極力否認同阿Paul分手，仲自爆兩人早已註冊結婚，力證情比金堅，記者會後更會合阿Paul一齊飛去澳洲度假兼辦理私人事務。當日傍晚阿Paul離開中環花旗銀行大廈嘅辦公室後，將自己部波子停泊喺立法會停車場，再轉坐七人車去接白姐姐同赴機場，六時半由機場貴賓通道步入禁區；連埋一早泊喺度嘅Benz，總共泊咗兩部車喺立法會停車場。
「一言難盡 返嚟先講」
咁究竟係阿Paul新丁議員誤踩地雷、抑或趕時間來不及駛走部車呢？我哋尋日與身在澳洲嘅阿Paul通過電話，佢話知道每個議員同一時間只准停泊一架車在立法會停車場，惟星期三嗰日趕住去機場會合白姐姐，急到嚟唔切將車輛駛返銅鑼灣百德新街住所，最快要下周一回港後才能到立法會攞車。
有傳聞話白姐姐今次攔截敵方導彈嘅手法，阿Paul好有意見。我哋尋日問阿Paul有冇嬲白姐姐？起初佢答話：「嬲？點解要嬲呀！」搞到咁大件事喎？佢沉默咗一、兩秒，然後話：「唉！一言難盡！返嚟先至講啦！」莫非呢對現代神鵰俠侶真係緣分已盡？