好嘞，事隔五個月，政壇新貴都開始變「舊貴」嘞，知名度有冇提高到呢？有眼不識高官嘅情況有冇改善呢？計功夫茶話齋，終於有一個副局長跑咗出嚟，算得上半個名人，呢個就係商務及經濟發展局副局長蘇錦樑。
何以見得蘇副局長嘅知名度高咗好多？當中有四大指標。
第一個指標：蘇錦樑嘅菲傭要向入境處申請續期留港工作，理論上要出示僱主嘅入息證明，譬如稅單或者糧單諸如此類，不過蘇錦樑好把炮，淨係叫菲傭拎佢一張名片向入境處Show一Show，而入境處職員竟然認得佢係高官喎，唔理三七二十一，即刻收貨，手續完成。
第二個指標：唔止入境處職員認得蘇錦樑係高官，知情人士一樣認得佢，於是就向傳媒投訴嘞，指摘佢名片當入息證明嘅做法係濫用特權打橫行。
第三個指標：傳媒同樣認得佢，發覺呢個「蘇副名片Show一Show」嘅做法的而且確有問題喎，冇理由人人都要出示入息證明先至可以過關，而佢就好似富家子弟上青樓咁樣，指指自己鼻哥就單刀直入。於是乎，傳媒大力鞭撻。
第四個指標：驚覺自己又闖禍嘅蘇錦樑，發表聲明指出：「我留意報章今天就有關我家外籍傭工申請續約的報道。我在處理這件事務上是有粗疏；但完全無意得到任何特別對待。我就這事件對同事們造成的不便及可能引起公眾的關注，深表抱歉。」由於傳媒認得佢，所以佢嘅聲明冇掟落垃圾桶，而係原汁原味刊登。
好嘞，講到呢度，大家認唔認同蘇副局長嘅知名度已經高咗好多？港大如果再做一次類似民調，功夫茶相信，受訪者會有咁嘅回應：哦，我梗係認得佢啦，佢好出名㗎，好鍾意Show自己名片嗰個，Show副局長吖嘛！
話時話，功夫茶因乜解究話佢「又闖禍」？大家可能唔記得，成單副局長風波裏面，其實係蘇錦樑帶頭出事嘅，佢係第一個被揭發擁有加拿大護照，跟住先至產生一連串「心繫加國」嘅雙重效忠問題，然後全部涉事者統統放棄外國護照。
唉，諗諗吓，蘇副局長認祖歸宗重新做番中國人，未必係一件好事。你知啦，醜陋嘅中國人最鍾意濫用特權，今次就話名片當入息證明啫，下次佢想北上深圳玩吓，隨時真係向入境處職員指指自己鼻哥就直出直入。
點都好，恭喜晒！蘇副局長終於唔再係寂寂無名嘅隱形高官啦，呢鋪可以叫做：名片一Show天下知！蘇副呀蘇副，呢張名片咁神奇，Show一Show就可以令到主人出晒名，借問聲，閣下喺邊度印㗎？