退休在即嘅科技大學校長朱經武唔經唔覺嚟咗香港八年，但佢早前接受中大新聞與傳播學院嘅實習刊物《Varsity》訪問時，直言香港只係佢第四個家，佢對香港嘅感情，大部分只係建基於科大。
前城大校長張信剛早前出席一國兩制中心活動時，慨嘆香港要搞好高等教育，自然要聘請外國一流學者來港執教鞭，但呢班外籍學者喺香港教幾年就走，過客心態重，加上香港依家嘅政治環境可謂動輒得咎，所以大家寧願明哲保身唔論政，都唔會就社會事務出謀獻策。無怪乎特區政府嘅管治近年愈做愈差，冇乜猛人肯出手相助。
視台灣為真正嘅家
朱校長好明顯就係上述社會現象嘅典型例子。佢覺得「每個人最重視嘅地方，係佢哋成長嘅地方」，佢由小學到大學都喺台灣度過，所以一直視台灣為真正嘅家。朱校長六二年喺台灣攞咗理學士學位後，就遠赴美國完成碩士同博士學位，之後佢因為喺高溫超導嘅研究取得重大突破而蜚聲國際，加上佢喺美國成家立室兼生咗一對精乖仔女，所以呢個讓佢取得人生中「最大成就」嘅地方，就成為第二個家。佢第三個家都唔係香港，而係中國嘅湖南，因為嗰度係佢同父母嘅出生地。
被港人同情心感動
數到最後朱校長先數到香港，佢直話直說，話香港只係佢第四個家，佢對香港嘅感情，大部分源於科大師生。好似年前喺香港讀書嘅內地生自殺身亡，香港社會回響好大，唔少港人捐款支持死者家人，香港人呢種同情心，令朱校長深為感動，相比之下，佢話呢方面美國就遠遠不及。可惜，香港喺朱校長心目中，只能夠排到第四位；唔怪得好多人話，香港只係一個「過客城市」，有的只係借來的時間、借來的地方；莫非九七前如是，九七後呢種宿命也不能改變？
朱校長對香港嘅感情唔深厚，相反港人就對佢十分愛戴。佢喺○二至○四年以及○六至○七年間，都喺港大民調中膺選最佳大學校長。近年特區政府管治班子民望屢創新低，如果政府再唔諗計留住好似朱校長呢班有料又深得民心嘅學者幫手，民望要止跌回升都幾難！