父子真正肝膽相照
本周一剛完成長達十一小時換肝手術的梁慶材，康復進展良好，已可以下床坐坐，可以食粥，而且胃口不俗，十多日後有望出院。他昨憶述手術完成後一醒來，心中第一時間感謝神、感謝太太支持，第一句說話便問「我個仔點呀？」得知阿熙的手術同樣成功，立即放下心頭大石。他說：「阿熙真係好勇敢，平時連蚊螆同曱甴都驚，今次咁大個手術，咁大個傷口都唔怕！」
阿熙手術後傷口仍感痛楚，忍痛走到父親床前慰問，梁父第一時間讚兒子「叻仔」。指阿熙一向乖仔，「依家身上有佢個器官，比以前更加親密，真正肝膽相照。」
阿熙的康復進展良好，可以下床走動，雖然傷口很痛，但認為一切非常值得，「佢係我老竇，如果我都救唔到佢，未必有人救到！痛少少換老竇條命係值得！」就讀城市大學的阿熙，因要捐肝趕不及準備五月的考試，已向校方反映希望能酌情處理，允許補考而不用重讀，正等候校方回覆。
感謝《東方》讀者支持
回想當日得知要換肝才能救命，梁慶材坦言已打定輸數，「凡事都有萬一，若換唔到肝可能冇命，即刻將銀行戶口轉晒阿熙個名，連平安紙都立埋，將房地產轉畀阿熙！」上周四他任職的社署部門為他辦祈禱會，之後便有好消息，阿熙通過第三次檢查，證實適宜捐肝，令梁家重現曙光。梁氏除感謝本報呼籲及市民支持，有數個他曾協助的家庭表示希望捐肝，雖然最終未能成事，但已令梁家非常感恩。在社福機構任職老人服務社工的梁太，更有一名九十多歲她曾協助的婆婆想捐肝，可見人間有情。
梁慶材病發至康復經過
日期 事 件
08年底 本身為乙肝帶菌者，往內地進食不潔海鮮後，全身變黃及感疲累。
09年2月 確診感染戊肝，並出現肝硬化，入院治療。
09年3月 轉往瑪麗醫院輪候肝臟移植，經本報呼籲市民死後捐肝，多名熱心讀者欲捐肝救命。
09年 原本不宜捐肝的長子阿熙，終通過體檢捐肝救父，兩父子當晚順利完成手術。
09年 父子倆肝功能逐漸康復，並接受本報專訪，感謝各界關心及慰問。