前工商及科技局局長王永平無官一身輕，依家不時都會發表文章評論時事，或者睇電影消磨時間。尋日喺尖沙咀文化中心見到平叔駐足觀看今年電影節嘅簡介，問佢係咪想買飛睇戲，點知佢話今年無買飛睇電影節，原來係因為太多人。
平叔尋日去尖沙咀，應邀出席一個電台嘅電視節目錄影，早到嘅佢先行一步入咗去文化中心，細心欣賞電影節嘅介紹，平叔話佢好鍾意睇電影，所以都有留意電影節有咩戲上。不過一問到佢睇咗邊套戲，平叔就話佢無買飛入場喎，事關太逼、太多人排隊買飛啦，想睇嘅，咪租碟返屋企舒舒服服咁睇囉！
其實平叔怕人多都有前科，好似今年農曆新年期間，平叔都專登揀早場去戲院睇《崖上的波兒》，佢話貪早場有長者優惠，其實可能係佢怕人多至真。不過，睇戲梗係喺戲院睇先過癮嘛，唔知遲啲會唔會喺戲院撞到佢呢？