先睇第一個解法。本報之前率先報道內地假證蔬菜源源不絕湧入本港,但食環署打死都唔認,一味話冇發現走私菜,繼續翹埋雙手,唔監唔管。呢嗱,卒之日前有立法會議員助理親眼睇晒成個走私過程,證明食環署嘅監管真係廢到無倫,玩死成個蔬菜批發業界,仲隨時玩死埋市民添。
至於另一個解法,唔使多講,連生人都畀食環署玩到謝,死人當然亦不得安寧。
話說有一名女子十年前去世,根據現行規定,凡土葬喺政府墳場以及華人永遠墳場管理委員會屬下嘅墳場,十年就要起骨,而起骨後嘅「淨執火化」工作,就要交畀食環署認可嘅承辦商負責。
既然講到明係食環署認可咯,承辦商仲拍晒心口話會依足政府規定程序做到最好,照計應該唔會差得去邊啦。
點知死者後人有日收到通知去檢視亡母骸骨,居然發現變咗另一副男性骸骨。承辦商依然死撐冇搞錯,死口唔認撈亂骨頭,死者後人只好報警求助,將骸骨送往政府化驗所,證實該骸骨真係男性。
連殯儀業人士都話,未聽過女骨會變咗男骨嘅怪事!計功夫茶話齋,其實一啲都唔奇怪,既然食環署監管求求其其,承辦商做嘢又點會唔馬馬虎虎吖?如果唔係死者後人堅持要檢查化驗嘅話,撈亂骨頭嘅事可能依家都冇人知!
警方發言人尋日話會加緊調查事件,初步調查顯示,當日一併處理送去石廠嘅骸骨有五副。問題係,由於呢間石廠唔止處理一個墳場嘅骸骨,即係話,撈亂骨頭唔止呢一單,話唔定好多孝子賢孫仲被蒙在鼓裏,繼續年年拜錯山、叩錯頭!
其實,類似例子以前已經發生過嘅喇。○七年九月有一位孝子去粉嶺和合石墳場準備為亡父起骨,點知打開個墳一睇,遺體冇咗影。吓,唔通有人盜墓偷屍?後尾食環署派人起墓,先至知道發生乜事,原來係棺木落葬時將兩個先人墓地移咗位,兩個家庭就無辜咯,一個拜空墳,另一個拜錯墳。
功夫茶硬係唔明,食環署唔知點解久唔久就搵死人開玩笑。嗱,試過有孝子為先人起骨時,棺材內多咗對義肢,唔通發生屍變怪事咩?講到尾,咪又係食環署擺烏龍!
正所謂名不正則言不順,家吓香港問題食品長驅直入,貓咁大嘅老鼠通街走,食物及環境衞生兩瓣都衰到爆,既然食環署玩人咁叻咯,不如改名好過,一於叫「玩人署」啦,笨!