上屆立法會議員被踢爆濫用公費外訪，為用盡外訪資助，個個都絞盡腦汁組團，呢股歪風蔓延至新一屆立法會，班議員又再密謀用公費外訪兼歐遊。政改諮詢押後到第四季進行，班泛民主派議員一邊鬧，一邊同埋建制派透過議會聯絡小組會，研究在暑假考察新興民主國家，結果捨近取遠，揀咗中歐嘅捷克、匈牙利以及克羅地亞，認真識揀。
立法會今年外訪經費為四十九萬五千元，聯絡小組建議，其中八人旅費可以用公費支付，自費前往考察嘅名額上限七人，最快可於八至九月暑假期間成行，稍後上內會通過建議。至於八個免費名額又點分配呢？根據慣例按黨派比例代表制分配，比較人多嘅建制派佔五個位，泛民只佔三個位，兩大陣營圍內再打崩頭爭奪名額，唯一唔使爭嘅就係聯絡小組主席石禮謙。
今次外訪去到中歐咁遠，有跟開政制嘅議員解釋，上述地方都係新興民主國家，民主進程同香港相似，例如捷克採用兩院制，類似香港嘅地區直選及功能組別，呢個解釋尚可接受，但竟然有議員老實不客氣，話因為未去過上述地方，所以想去喎，聽落認真離譜！