黑仔天文台長林超英下周一開始退休前休假，天文台連日為佢安排多場歡送會。近排好多退休高官忍唔住都炮轟政府，黑英就寄語舊部話，市民知識水平不斷提升，對政府要求愈來愈高，公務員唔可以再匿喺象牙塔入面，郁吓就搬出「專業」兩個字做擋箭牌；要面向市民，處事透明化，唔好以為自己就高高在上。
黑英最記得○六年颱風派比安襲港，當時天文台因為冇掛八號波而捱批，事件令佢上咗一堂，就係社會需求不停轉變，政府部門唔能夠單睇數據做決定，凡事太過理性反而會犯錯。最後天文台都從善如流，增加監測地區風力。
回顧喺天文台嘅三十幾年，黑英誓神劈願話，從來無人影響到佢哋應該掛幾多號波；不過佢都忍唔住吐真言話，喺公務員體制下，如果冇事發生，都好難去改變任何事，政府部門有時真係要畀人鬧先至會有反應。聽佢咁講，就知道公務員架構幾咁僵化喇！
臨別秋波，黑英設計咗一款摺扇送畀記者，上面寫住佢嘅座右銘，就係「以科學為基礎，以服務為目的，以人民生命為第一考慮」，寓意深長。黑英離任後會先去巴勒斯坦旅行，仲講明以後唔會指點評論天文台工作，只會得閒去學校做講座。至於署理天文台長李本瀅就下周一上任。