本文重點
葵涌食品嘉年華尋日開幕，身為大旗手嘅廠商會副會長施榮懷瞓身催谷，請來商務及經濟發展局副局長蘇錦樑（阿Greg）同香港小姐冠軍謝寧打頭炮，表演雌雄版美女廚房煮嘢食。
阿Greg表演整菠菜煙肉沙律，雖然話有家傳「秘製混醬」，不過叻到識飛都係沙律一碟；謝寧就唔同，開鑊起火煮牛肉卷，點計都勝一籌！
阿Greg早前搞淫審諮詢身經百戰，但係論廚藝，始終係新手一名，同出過烹飪書嘅謝寧同場較技，未戰先降，表明結婚之後未入過廚房，感到好大壓力，仲自嘲解窘：「我呢個阿蘇唔係嗰個阿蘇呀（美食節目主持人蘇施黃）！」阿Greg現場將帶嚟嘅碎蛋、菠菜同煙肉撈勻，再用糖、醋同黑胡椒倒埋一齊，三扒兩撥就交貨，佢聲稱醬料係「家傳秘方」，不過卓妮就睇唔出有乜咁唔同嘞。
尹德勝：「似無添加食品」
反觀謝寧做足功課，知道副局長做沙律，決定用牛肉卷配合，用牛肉薄片捲起芋絲，用平底鑊慢火煎，再加燒肉汁，齋聽都令人流口水。最後廠商會會長尹德勝試食，例牌答案話兩個都好好食，其後吐真言，話阿Greg份沙律似「無添加食品」喎，莫非真係冇乜味道？
尋日副局長都有逛吓食品嘉年華，消費咗二百幾蚊買鐵觀音茶葉、澳洲一口鮑，但人哋送畀佢啲嘢就仲多，兩大盒麵食、燕麥片等，唔怪得佢笑言：「前局長同我講呢份工好多嘢食，依家體會到啦！」
卓妮