本文重點
自由黨九龍灣Manhattan Place八樓新總部入伙將近一個月，三位正、副主席劉健儀（Miriam）、張宇人（Tommy）同方剛（Vincent）尋日做導遊，帶傳媒朋友上新竇行一圈，畀大家見識吓佢哋間會議室嘅落地玻璃無敵大海景。自由黨總壇面貌一新，朝氣勃勃，Miriam透露，遲啲會親身掛帥，落天水圍同周永勤共組辦事處，唔通佢想部署二○一二年出征新界西，填補「莎姐」周梁淑怡落選後嘅空缺？Miriam就好低調話，只係發展地區事務，叫大家唔好揣測咁多喎！
自由黨搬竇，無擺入伙酒，Miriam尋日親手整兜愛兒最鍾意食嘅橄欖油蒜蓉意粉招待大家，Tommy就搵蛋撻王嘅師傅沖絲襪奶茶畀大家飲。Miriam話，呢個由前主席田北俊以一蚊雞象徵式出租嘅新總部，佔地近五千呎，以同區二十蚊呎價計，黨每月慳番十萬元。不過上屋搬下屋，唔見一籮穀，復修舊總部交吉同新總部裝修，都分別使咗六位數字。
劉健儀婚姻喻收黨員
前自由黨黨員李躍輝喺大圍區議會補選中涉嫌賄選，Miriam話，自由黨最快今年搞招募黨員行動，但好難杜絕李躍輝式人物撞埋。佢仲話自由黨收黨員，依家已經好嚴，最近有二十幾個專業人士入黨，不過亦推咗幾個入黨申請，理由十分簡單，「大家理念唔夾，費事第日離婚」。
自由黨現有黨員四百幾人，距離高峰期嘅九百人差咗一截，但Miriam寧缺勿濫，呢樣都係自由黨新風格。
卓妮