家有囍事！整整「砌砌」團年

「年又過年，共慶歡樂年年……」農曆新年就快到，食團年飯係華人傳統活動，今年LEGO人仔都要食埋一份，仲要三代同堂樂聚天倫，皆因LEGO新推出賀年套裝「80101 Chinese New Year's Eve Dinner」，應節地呈現團年情景。另有舞龍積木套裝和大型商場布置，一於玩住嚟送狗迎豬啦！

「80101 Chinese New Year’s Eve Dinner」以團年飯為主題，勁好意頭。售價︰$559

充滿節日氣氛

LEGO向來會於聖誕節、萬聖節等推出應節套裝，亦曾為新春加推生肖系列。今次特別為亞洲地區炮製「80101 Chinese New Year's Eve Dinner」，破天荒打造出中式團年飯，全副由616個零件組成，小記砌時於兩塊16×16底板，順序搭建花園、牆身、飯枱及傢俬，由外到內約138個步驟，就算是新手也能於90分鐘內完成。為營造節日氣氛，除了門窗張燈結綵，大門更貼有倒轉福字，取其「福到」之意。大廳則可找到年花、全家福、中國傳統剪紙及「吉祥如意」等揮春。

九大簋賀年菜

話明團年飯，意頭菜當然少不了，桌上除了魚蝦蟹之外，仲有髀翼雙飛（雞）、冬菇、餃子、春卷、油菜、豆腐羹，九大簋加上湯圓年糕，雖然全是印刷件，但每人均有獨立碗筷，圓枱又可360度旋轉，設計精細。Minifigures則是一家六口，包括爺爺、嫲嫲、爸爸、媽媽、孫仔及孫女，旗袍馬褂印刷精美，部分附有兩個表情，小朋友仲可以向長輩𢭃利是，令人會心微笑。