PowerRay潛拍無人機30米水底歷奇

「航拍」大家就聽得多，「潛拍」又玩過未呢？總部設於北京的PowerVision，向來主力研發智能機械裝置及無人機產品，最新推出的PowerRay水底無人機，最深可下潛至30米，而且機前植入4K鏡頭，能夠以超高清畫質拍攝深海奇觀，無論水中魚仔或者珊瑚都睇得清楚，仲能配合VR眼罩大玩第一身潛拍，讓各位猶如置身深海歷奇。

PowerRay
售價：$20,999

連接電纜傳送資訊

PowerRay用上黑白機身設計，外觀有少少似魔鬼魚，前方鏡頭可拍攝4K＠25p影片及1,240萬像素相片，而且鏡頭兩邊配備LED燈，以便在昏暗的水底照明，甚至可因應水中環境來調校亮度。為了方便傳送影像資料，PowerRay必須透過70米長的特製纖維纜線連接基站（Base Station），此基站主要用來發射Wi-Fi信號，將影像傳送至遙控器和手機App中，因此一般情況下基站會固定於岸邊或船上；就算意外停航，也可利用纜線取回無人機。

附有度身訂造的專用拖篋，機身及配件都可妥善收藏。

底部可加裝Fishfinder聲納尋魚器，有效探測機下40米深度的水底環境。

底部前方可掛上魚餌鈎環，針對釣魚發燒友準確投放魚餌到最佳位置。

聲納雷達探測魚群

無人機唔單止能進行水底拍攝，它亦針對釣魚發燒友而設計，底部能夠安裝Fishfinder聲納尋魚器，有效探測下方40米範圍的水底，了解魚群分布、深度、礁石地形等。機底還設有可掛載魚餌的鈎環，當探測到魚群後即可利用遙控準確放下餌食。相比航拍機，PowerRay的續航力更長，它內置6,400mAh電池，視乎航行速度能夠玩到30分鐘至4小時，當靜止時摩打唔會驅動，令機身自動浮上水面。

前方鏡頭可拍攝4K＠25p畫面，兩側更設有LED燈作照明用途。

尾部備有兩個推進器協助前進，而指示燈可顯示連接狀態。

PowerRay水底無人機可深潛30米，靜止時機身會自動浮上水面。

VR體感操控

跟機附有的遙控器，操控跟傳統航拍機分別不大，既可調校3種速度，並設有聲納、定深等快捷鍵，可夾實手機或平板，配合專用《Vision+》App實時瀏覽潛拍畫面，仲可睇到機身傾斜狀態、聲納畫面等資訊。另一好玩之處是支援VR體感操控，只要把手機App切換至VR模式，並插入跟機附送的VR眼罩，即可以第一身視點睇到水底環境，無人機仲會跟住玩家頭部動作上下左右移動，不過小記試機時，發覺香港不少水域的能見度較低，第一身潛拍時難以辨別方向，建議到水質清澈或潛水熱點「游」玩。

連接PowerRay的基站用作傳送影像資料，纜線足足有70米咁長。	《Vision+》手機App支援聲納畫面，從而睇到魚群分布、深度等。	App能夠實時瀏覽水底畫面，亦會顯示下潛深度、機身傾斜角度等資訊。
遙控器的操作跟航拍機大同小異，可因應需要調校3種航行速度。	試後感：利用VR眼罩第一身試玩，感覺好像親身潛落水底一樣，仲能夠以體感操控，潛拍無人機會根據頭部動作而擺動。