AQUOS S3全屏再發育

全屏幕繼續係今年手機界的重點設計元素，單計最近發布的已經有華為P20、小米Mix 2S等，就連「細廠」都有好選擇，講緊就係Sharp第二代新機AQUOS S3。新機最大特點當然就係高達91%的屏幕佔機面比例，屏幕尺寸增加至6吋；加上雙鏡頭解像度、功能均大幅提升，升級有理！

售價：$3,980

屏幕佔機面達91%

上代AQUOS S2可以話係全屏幕手機的始祖之一，唔少用家都大讚設計靚。今代AQUOS S3設計上再有進步，屏幕佔機面比例由上代的87.5%，再提升至91%，將全屏幕元素玩得更盡！新機機身比上代稍稍變大，但屏幕尺寸亦相應增大至6吋，配合2,160×1,080解像度，以及繼承上代的135% sRGB廣色域及550nit高亮度，煲劇、睇相效果非常好。小記覺得要扣分就係俗稱「M字額」的屏幕頂凹位，比AQUOS S2的「美人尖」所佔面積更大；猶幸將前置鏡頭升級至1,600萬像素，亦加入外置聽筒、LED提示燈及距離感應器，功能確實有所提升。

曲面玻璃機背，黑鏡效果好吸引。

附送磨沙機背殼，即時保護靚靚機背。

機背雙鏡頭同升級

除了屏幕質素高，新機做工亦是加分位。中框用上金屬製作，機背則用曲面玻璃，黑鏡效果美觀之餘，手感亦好。而且廠商仲貼心地將機背指紋辨識器的外圈以及機側音量、電源鍵沿邊都用上玫瑰金色，外形更高貴，值得一讚。不過要留意，有別於上代提供伯爵藍、薄荷藍等特別配色，AQUOS S3暫時只提供鎏金黑一色，「好色」一族可能會投訴喇！機背鏡頭驟眼看以為與上代一樣，實情雙鏡頭像素均一併升級，由1,200萬像素及1,300萬像素鏡頭組成，除了支援人像景深模式，1至7級虛化方便用家玩前清後朦效果；更兼容2倍光學變焦，拍攝遠景更加就手。

內置《手機助手》，自動清除系統垃圾。

預載《Pubu飽讀電子書》，大量台灣圖書、雜誌供購買。

採用SmileUX介面，不設功能表，操作流暢。

隱私空間難揭破

至於硬件，有別於上代分為一般版及高版配，新機一律採用Snapdragon 630處理器、4GB RAM及64GB ROM，並提供microSD卡槽擴充容量，效能唔算突出，屬中階機級數，一般小遊戲、上網、睇片都應付有餘。反而軟件有驚喜，預載Android 8.0作業系統，並採用自家SmileUX介面，最特別要數面部辨識以及隱私空間。面部辨識雖然好多旗艦機都支援，但AQUOS S3的辨識速度比預期中快得多，亮屏1秒已經成功辨識兼解鎖；而隱私空間就可以不着痕迹地儲存圖片、影片、文件、Apps等資料，要打開隱私空間就需要於撥號介面輸入預設密碼，超隱秘！

《S Boost智慧加速》會自動調整CPU、GPU及屏幕解像度，令操作更順暢。	支援一系列體感動作，例如雙擊點亮屏幕、三指截圖等。	開啟隱私空間，需要於撥號介面輸入密碼，一般人冇咁易破解到啩！
採用USB Type-C介面，支援快速充電技術；留意新機不設耳機插口，但附送USB Type-C轉3.5mm耳機轉插。	提供一個SIM卡槽，另支援microSD擴充容量。	台灣水貨採用兩腳火牛，電流輸出最高為12V/1.5A。