實試iPhone X ! 全屏喪玩Animoji

全屏機王iPhone X將於明天（11月3日）開賣，大家除咗關心炒價，全屏功能亦是機迷看點。Apple特別在北京總部舉行試玩會，讓傳媒率先試玩新機，實物所見，擁有5.8吋OLED屏幕的iPhone X，不但比iPhone 8 Plus易拎，仲可玩盡Animoji動態表情符號，將兔仔、便便等表情對話儲存成影片，分享畀朋友話咁易。

iPhone X用上全屏設計，5.8吋屏幕幾乎用盡整個機面，睇片時顏色亮麗。

太空灰色搶眼

小記早於9月在美國Apple發布會時已見過iPhone X真身，惟當時未能詳細把玩，今次摸上手細看，發覺金屬機身打磨得相當精巧，連凸出的雙鏡頭都唔刮手，而且體積只有143.6×70.9×7.7mm，比iPhone 8 Plus的骰。顏色方面，小記較Like太空灰色，Cool得嚟與玻璃面好夾；反而銀色版的機背Apple Logo唔夠清楚，Show Off冇咁正。特別一提，兩色機身在燈光底下都會反光，幸好不易沾上指模及灰塵。

操作不難上手

新機抽走了機面Home鍵，介面操控略有不同，例如由屏幕底部往上推會回到Home頁，繼續長按則打開多工處理模式，從屏幕右上角往下掃則開啟控制中心等。操作要時間適應，但基本上一學就識，不難上手。此外，5.8吋全屏畫質提升至2,436×1,125解像度及458ppi像素密度，最正係睇片時可Zoom In或Zoom Out，想睇幾大就幾大。當然若果冇埋機面鏡頭和收音咪位置嘅「M字額」，睇片就更好Feel。

無論是太空灰（左）或銀色（右），機面都用上黑色邊框及全屏設計，較難分辨。

提供太空灰及銀色選擇，表面均有玻璃保護，不易沾上指紋。

機側金屬強，並經過精細打磨，厚度只有7.7mm，手感極佳。

頭部打圈認樣

新機另一賣點是支援Face ID，小記現場登記時頭部要打圈兩次才成功，工作人員話只要慢速打圈，手機就能辨識記錄，唔使太大動作；登記後望一望手機就能解鎖。此外，TrueDepth Camera前置鏡頭都好多嘢玩，例如可透過Animoji功能，將自己變成兔子、便便等表情符號，它能跟隨用戶的表情變化，不但可用於iMessage，還可另存成影片分享出來，用落WhatsApp一樣掂。特別一提，此技術還可與《Clips》程式配合使用，為用戶加入360度動態場景，並提供大都市、星戰、卡通等濾鏡，淨係得iPhone X可以咁玩！