首爾實試NBA 2K18 MyCAREER鬥波升呢

All-Time Team經典雲集

早幾代《NBA 2K》系列已加入經典球隊，今集再新增有「Big Four」年代嘅03~04湖人、上演「黑八傳奇」嘅06~07金州勇士等17隊球隊，令經典球隊增至62隊。而球隊每個年代都有代表性嘅球星，有冇諗過Shaquille O'Neal、Kobe Bryant、Magic Johnson、Kareem Abdul-Jabbar一眾湖人名宿可以同場比賽呢？《NBA 2K18》就可幫你實現願望，皆因All-Time Team全時制霸陣容可跨時代組成29支超級球隊，正選後備粒粒皆星，唯一美中不足係全部球員穿上現代球衣，如果有番當年嘅懷舊Look就更原汁原味。

All-Time Team入面，洛杉磯湖人應該係最強球隊之一，正選有O’Neal（左三）、Kobe（右四）、Magic Johnson（左一）、Abdul-Jabbar（右三），後備仲有Chamberlain（右二）、Gasol（右一）等人。	現場攞咗上集（左）與今集（右）嘅Gordon Hayward比較，無論人臉細節、球衣質感都有大幅改善。	畫面逼真度再提升，好似Kevin Durant（左）和LeBron James（右）似足真人。

玩家線上版圖互動

育成原創球員嘅MyCAREER模式，今集加入「Run the Neighborhood」玩法，一眾玩家自訂角色後可於同一線上版圖互動，這種類似MMORPG的開放世界提供不同類型活動，例如可到NBA商店買波衫裝備、於Foot Locker選購超過2,000款球鞋，大街上更有紋身店、髮型屋等，隨時讓玩家改變造型。另有健身中心可提升角色能力，還加設2K Zone小遊戲，例如迷你投籃機、預測NBA真實賽果等，藉此賺取虛擬貨幣。升級角色都係為咗打波，大街上的球場可玩1對1、入樽等，而由MyPark變種而成的The Playground，更可與不同玩家組隊鬥波，終極目標係打入NBA。至於玩家的大屋備有個人球場可練波之餘，亦能邀請線上朋友作客打《NBA 2K18》，玩味勁濃。

Run the Neighborhood設有健身中心，可提升角色能力。	去到Foot Locker有超過2,000款新舊款式波鞋畀你揀。	以往嘅MyPark變成The Playground，提供7個全場可組隊鬥波。

明天序章免費下載

逼真畫面一向係遊戲強項，新作連細節位都唔放過，例如臉部膚質、手臂紋身等都如實呈現，製作人Erick表示，連一啲冇咁出名嘅球員如孟菲斯灰熊的Ben Mclemore、洛杉磯湖人新秀榜眼Lonzo Ball等，都會進行人臉掃描提升逼真度。同時將球衣、球鞋、護具等進行雷射掃描，令顏色、縫線、紋理都似足實物。值得一提，《NBA 2K18》將首度登陸任天堂Switch，所有模式及內容都可玩足，加上可以拎出街打機，絕對值得入手。而明天（9月8日）開始，用家可到網上商店免費下載序章試玩，以自創球員於街場鬥波，進度可以保留至正式版遊戲，粉絲們冇理由錯過！

玩家可以游走大街，進入不同店舖及參與活動，類似開放世界玩法。	2K Zone設有小遊戲如迷你投籃機，高分嘅話可贏得虛擬貨幣。	投籃時畫面上方會出現長方格以文字顯示拉桿時機及出手情況。
製作人Erick Boenisch表示：「今集有幾項大改進，第一個是全新動作系統，提升流暢度之餘，控制權亦回到玩家手中；另一個是Run the Neighborhood，以往MyCAREER模式只有玩家單機進行，今集讓全世界玩家互動，玩法更豐富。」	由於預先印製關係，所以標準版封面仍然係身穿克利夫蘭騎士球衣嘅Kyrie Irving，但遊戲內已將球員轉會更新。

DETAILS

類型：籃球運動

發行：2K Games

推出日期：9月19日

售價：$468（標準版）、$778（傳奇珍藏版）、$1,168（黃金傳奇珍藏版）

特派記者：林子聰

鳴謝：Take-Two Interactive