5.5吋堅果Pro 創意爆燈

內地手機市場近年百花齊放，除咗出晒名嘅Huawei、小米、ZTE，其實仲有唔少網友推崇嘅品牌，好似錘子科技（Smartisan）最近正式攻港，行貨以5.5吋堅果Pro打頭陣，大玩前後玻璃靚樣，而且介面和功能都創意爆燈，$2,799真係諗得過。

堅果Pro預載Smartisan OS 3.7，不設功能表及虛擬功能鍵，幸好操作都算方便。售價：$2,799

雙面玻璃美感

2012年成立的錘子科技，英文名Smartisan係由Smart、Artisan兩字合成，代表智能手機工匠。工匠最注重嘅係手藝，堅果Pro當然承傳這精神，有別於市面的弧邊手機設計，新機棱角分明感覺硬朗，而且機面機底均加入強化玻璃，底部則用上黑色磨沙物料配以金屬邊框，整體厚度只有6.98mm，做工有着高水準。至於內地提供紅、金、啡等多色選擇，惟港版暫時只有大路的碳黑色，以及有着酒紅色線框的細紅線特別版，兩色定價相同，小記覺得後者較為吸引。

1,300萬像素雙鏡

新機走二千多元的中價路線，5.5吋全高清屏幕配以Snapdragon 626八核心處理器、4GB RAM及128GB ROM，效能未算頂級，但用嚟打機、煲劇絕對夠用。影相方面，備有1,600萬像素前置鏡頭，支援磨皮、增白、大眼效果等美顏模式，自拍必備；最重要是後置1,300萬像素雙鏡頭，仲支援大量拍攝模式如縮時攝影、慢動作、大光圈、全景、專業、掃描卡片等，應付到日常需要。而其3,500mAh電池支援Quick Charge 3.0技術，官方表示充電1小時可回復80%電量，加上兼容逆向充電，隨時變身「尿袋」冇難度。

機底設有喇叭及USB Type-C插口，惟不設3.5mm耳機插口。

機身棱角分明，細紅線特別版邊位加入酒紅色線框。

長按Home鍵可進入「閃念膠囊」，語音輸入支援廣東話、普通話、英語等。

文書記事新功能

系統操控更是一大噱頭，於Android 7.1植入自家介面Smartisan OS 3.7，主頁外觀和操作方式都與原生Android截然不同，不設功能表之餘，於主頁向上一掃即可進入搜尋頁面；同時抽走虛擬功能鍵，操作靠晒Home鍵，輕觸代表返回、按下則回到主頁、連按兩下轉至多工頁面，還結合指紋辨識功能，用慣Android手機嘅用家要適應一下。另預載一系列創意功能，當中最實用係「閃念膠囊」（Idea Pills）及「大爆炸」（Big Bang），前者只要長按Home鍵便可作語音輸入，讓用家即時記低備忘或想法，語音還會自動變成文字，方便之後將「膠囊」內容修改，甚至轉到行事曆、短訊等。小記測試時發覺連廣東話都認到，不過中英夾雜就會出現錯字。「大爆炸」是對住畫面或網頁文字，以指腹大範圍按下，這樣所有字句都會分拆成詞語或單字並擷取下來，讓各位進行編輯如調位、刪減、複製等，文書工作相當合用。

以指腹大範圍按下文字可啟動「大爆炸」擷取所有字句，惟手指幼細的人士可能較難用。	玻璃機背的下方加入磨沙物料，不過都幾反光，容易沾上指模。	於任何頁面從邊緣向內一掃就會彈出「閃念膠囊」的內容，以便進行編輯。
另一新功能名為「一步」（One Step），頁面會長置橫直兩欄功能，可將文字及圖片快速拖拉至不同程式。	「大爆炸」亦支援圖片識別，可擷取圖片內的文字，但辨識率不高。	影相介面簡單易用，而且內置多個拍攝模式。