戴VR眼罩 火併悟空

有邊個大細路童年時唔幻想自己成為《龍珠》裏面嘅悟空,使出龜波氣功對付敵人?沒想到這個兒時夢想竟然可以成真!事關日本MegaHouse最近推出了BotsNew Characters VR《龍珠Z》眼罩,只需配合專屬手機App即可讓悟空現身,同大家比試龜波氣功,又可以搵比達特訓連環出波,仲有舞空術收集龍珠遊戲,眼罩亦可變成戰鬥力偵測器,即時辨識朋友嘅戰鬥力有幾強!

眼罩Capsule出品

作為《龍珠》VR眼罩,呢款BotsNew Characters VR就寫到明係莊子嘅膠囊公司Capsule Corporation出品,單係咁經已叫粉絲玩得夠晒投入。象牙白色外殼設計,眼罩部分和頭頂均加入軟墊,令長時間遊玩仍感舒適,而且上方和兩側頭帶以魔術貼來調校長短,以便不同頭形玩家輕鬆佩戴。另外眼罩兩側備有金屬紅色旋鈕來調整焦點,頂端中央處也可調節瞳孔間距,功能和一般VR眼罩無異。包裝也提供1塊特製硬卡和2個夾在手指的虛擬實境感測器,玩家要靠手機感測特定標記來完成指令。

AR出龜波兼測戰鬥力

講咗咁多,其實《龍珠》VR眼罩玩法超簡單,只需搵部4~6吋智能手機安裝專屬Apps並啟動,再打開前方Lens將手機放置在內,便可享受120度廣角觀看體驗。玩家唔知安裝咩Apps?唔緊要,只要用手機鏡頭掃描包裝盒側QR Code,即可進入官網下載相關程式。官方現時提供1個教學和5款Game Apps,分別玩2個AR和3個VR遊戲。先講必玩的《龜波氣功體感AR》和《究極公式Scouter AR》,前者可將悟空或比達呈現在現實環境向玩家出招,玩家就要利用夾在手指的感測器,作好出波姿勢施展龜波氣功打低對方,還可以學笛子魔童使出魔貫光殺炮擺甫士影相。至於後者即是撒亞人所用的戰鬥力偵測器,玩家可以透過臉部辨識朋友的相貌來分析戰鬥力,最後更會以相關《龍珠》角色作配對,玩完仲可以擷圖分享至社交平台!

VR迎戰比達與菲利

另外3款VR遊戲玩法比較刺激,當中《亂暴Battle VR》和《特訓體感!比達VR》需要玩家較大體力活動。前者要玩家面對空群而出的培植人,利用連環出波逐一擊破,然後悟空或比達便會現身跟玩家合作出絕招,緊接「大佬」菲利登場和玩家決一勝負;後者則需要完成比達特訓,一邊晃動頭部避開攻擊一邊還擊。此外,還有一款收集龍珠遊戲《舞空術VR》,2個夾在手指的感測器會成為玩家的加速移動和龍珠雷達,而轉動頭部就改變飛行方向,玩家需要在限時內找尋7粒龍珠,小心玩到頭暈呢!

查詢電話:3148 9455

撰文:廖俊斌

攝影:張群生