M8照騙再現美少女變身

「美少女轉身變，已變成戰士！」唔少女士都幻想過自己變成美少女戰士，但係自知其貌不揚，又冇月野兔咁可愛點算好？Meitu（美圖）便為粉絲設想，特別於香港發布全新中階手機M8，有齊美顏、淺景深等照「騙」功能，仲推出美少女戰士全球限量版，附送螺旋心月棒自拍棍，一於買嚟警惡懲奸兼收兵！

售價：$3,799（標準版）、$4,599（美少女戰士全球限量版，7月20日開售）

三色雙V形機身

Meitu今年3月才推出T8照「騙」神器，咁快又出M8？驟眼睇兩機猶如孖生姐妹，同樣採用雙V形機身、5.2吋全高清屏幕，連下方指紋辨識鍵及機側自拍倒數掣也相同。只不過M8走中階路線，機背由全金屬變成3D弧形玻璃，跟金屬邊框大玩Mix & Match，加上備有月光白、櫻花粉、魅影紅三色選擇，啱晒鍾意「搶Fo」嘅女士使用。今次新增的美少女戰士版特別在機背印有Sailor Moon剪影花紋，並置入專屬介面，隨禮盒還附送收藏證書及螺旋心月棒自拍棍，全球限量10,000部，各位禮服蒙面俠要準備好搶畀女神了。

限量版手機每部均印有美少女戰士剪影花紋，並預載專屬介面。

M8採用招牌雙V形機身，5.2吋屏幕下方設指紋辨識鍵。

人工智能美顏

影相向來係廠方強項，雖然M8嘅定位冇T8咁高，卻移植了後者的2,100萬像素主鏡頭及1,200萬像素前置鏡頭，還支援Dual Pixel雙像素、PDAF毫秒級對焦及OIS光學防手震等高階技術，能夠實時追蹤人臉兼減低抖震，自拍肯定唔會鬆郁朦。講到自拍，新機另一特色是強化了人工智能，除年齡、性別、五官外，還能分析膚色、頭髮、半身、輪廓及自拍時的臉部光線，再提供針對性的美顏方案。現場試拍所見，真係將Model執到白滑自然，飛走晒黑眼圈同痘痘，照「騙」一流！

標準版提供月光白、魅影紅、櫻花粉三色選擇，當中以紅色最Sharp。

USB Type-C、3.5mm耳機插口及喇叭均設於機底。

只可插一張SIM卡，值得留意是不設microSD卡槽。

背景虛化添玩味

潮流興玩景深，新機嘅人工智能仲識得自動分辨相片中的人、景、物，並把背景虛化來突出主題。小記試玩時發現，只要人像跟背景有一定對比度，便能拍出明顯的淺景深效果，而且內置多款背景供更換，玩味十足。美中不足係人像邊緣唔夠Sharp，帶點夢幻效果，如果改善埋就Perfect了。硬件方面則用上Helio X20十核心處理器及4GB RAM，撥頁打機都算流暢，不過機身冇得插記憶卡，得64GB容量又點夠女士們瘋狂Selfie呢？

美少女戰士全球限量版隨禮盒附送透明手機套、收藏證書及螺旋心月棒自拍棍。	試相區背景虛化效果感覺夢幻，只要主體跟背景有一定對比度，就有明顯效果。	美化背景功能可切換不同背景主題，扮Cover Girl冇難度。
美顏功能相當豐富，想變身美少女話咁易。	指紋可用於鎖上「私密相片集」，方便姐妹們收埋私密照片。	內置時下最流行的貼紙相功能，呃Like指數大大提升。