Volkswagen Caddy Kombi實用先決

好多人買車都會考慮到空間及實用性，若然Budget有限，又要七座位、行李艙夠大，市場上似乎冇乜選擇。不過唔使灰住，皆因Volkswagen最近就引進咗Caddy Kombi 7-seater，車身同早前推出的長陣版Caddy Maxi咁大，載得人來又載到貨，啱晒喜愛大夥人戶外活動人士！

Volkswagen Caddy Kombi

經濟實用大原則

Volkswagen Caddy有商用及乘用版，有人話部車似貨Van，亦有人覺得似私家車，無論點都好，Caddy都是一部十分經濟實用的車款。現時，廠方推出Early Bird優惠，頭15部只需$24.9萬起就買得到，仲可免費享有5年原廠保用，作為家庭車又好、久唔久送一兩轉貨又好，Caddy Kombi都符合經濟實用的大原則。Caddy在本港有Maxi（五座貨Van）及Kombi（七座MPV）兩個版本，外觀分別唔算好大，但要分辨都唔難，因應法例要求，貨Van定位的Caddy Maxi要封上後側窗，這正是與Kombi乘用版的最大分別。

6.5吋Composition Media屬標準配置，並接駁了6個喇叭。

整個後座可完全拆走，以騰出更多載貨空間。

中排設有收摺式小餐桌，需要時才揭起使用。

易拆後座空間更大

Caddy Kombi的空間運用靈活多變，七座設定下仍有530公升的尾箱容量，保溫箱都可以放幾個，親友BBQ相聚一車搞掂晒。如要運送大型物件，最簡單的做法是翻平中、後排的椅背，或將整個中排向前翻，幾個步驟就搞掂。仲唔夠用？還有一個非常「絕」的方法，將整個後座拆走！聽落好似好誇張、好複雜，實際卻非常Easy，唔使用螺絲批或任何工具，只要拉動座椅後方兩側的尼龍帶就可解除座椅的固定鎖，再向後一拉便可拆走，騰出來的空間大到連單車、滑水板都放得落，鍾意戶外活動的朋友應該好Buy呢點，唯一問題是要諗諗計，搵個地方安置張櫈，斷估唔會就咁放喺停車位地下啩？

放大圖片

車長有成4,878mm，車廂空間非常見使。

後泊鏡配合泊車警示器使用，倒車仲邊有難度？

節能引擎油耗不高

既然部車以經濟主打，油耗表現當然是重點，儘管本港有售的Caddy Kombi搭配1.4 TSI引擎，有別於Caddy Maxi的2.0 TDI，享受唔到較相宜的柴油價格，但眾所周知Volkswagen的1.4 TSI本身已非常節能，油費開支都是有限數。況且，扭力早在1,500rpm已可全數釋出，起步加速及上斜都毋須猛踩油門，大部分時間都可保持低轉行車，怎會唔慳油？據廠方提供的資料指，配上七前速DSG雙離合器波箱，每100km的綜合油耗只需5.7公升，未計任何折扣的燃油成本亦僅為$0.86/km。上斜時，基本上三分之一油門已夠晒力，相信滿載都不會出現拉牛上樹的情況。想揸得有Feel，將波棍拉落「S」就得，波檔選擇一般都會較「D」檔低，並會延後轉波點，加速反應變得更凌厲，駕駛樂趣進一步提升。

引擎雖只有1.4公升，但扭力卻高達220Nm。	波箱為七前速DSG，並附設加減波功能。	車身兩邊都設有趟門，方便上落。
後排乘坐空間不錯，成年人坐都沒有大問題。	趟門側窗可以打開，不過以橫開設計。	車頂裝上行李架，型格得來又實用。

車身較高Headroom受惠

Caddy Kombi的車身高度達1,868mm，比起同門的Sharan、Tiguan2，以至市場上大部分SUV都要高，車廂Headroom就最受惠，載得多貨之餘又坐得舒適，高佬坐前、中排都唔會有頂頭頂腳的困擾，夠晒空間感。同時，車廂設有大量儲物格，不論是擋風玻璃上方或櫈底都預留了地方置物，更多的雜物都可輕鬆收納。作為家庭車，能保障家庭成員的安全至為重要，預載的不僅有8組安全氣袋，還有二次防撞預煞系統、電子行車穩定系統、循迹防滑系統、電子防滑差速器及疲勞駕駛警示系統等。現時，Caddy Kombi 7-seater的標準設備已包括Bi-xenon頭燈、真皮軚盤、6.5吋Composition Media及巡航系統，不用$25萬的車價，相信可吸納一班追求實用、喜愛戶外活動的新客源。

擋風玻璃上方預留了置物位置，一般私家車較少見。	中控台上方設有儲物兜，適合擺放電話及太陽眼鏡等物件。	座椅底部設有小櫃桶，可收納汽車維修小工具。
中排設有獨立送風口，使車廂溫度更平均。	波棍前方設有USB插口，方便為手機充電。