ISUZU D-MAX Pick-up Deluxe SUV潮型新空間

近年Pick-up貨車愈來愈流行，除咗受建築及工程業界歡迎外，唔少喜愛戶外活動的人士都愛上玩貨斗！或者你會問，點解Pick-up會突然爆紅？設計趨向私家車化固之然是重點，二來是自動波車款多咗，中正本地消費者所需。最近，ISUZU為D-MAX帶來全新的Deluxe版，藍牙音響、後泊鏡、18吋軨等等均為標準配備，仲要升級至六前速加減波，直情可當SUV咁用！

ISUZU D-MAX Pick-up Deluxe SUV

粗獷外表男女合用

撇除商業用家不計，買Pick-up的人除咗為實用外，唔多唔少都係為咗型，Man爆粗獷的外表，揸出街當堂多幾分男兒氣概。女仔揸又點睇？唔使講，直頭型到核爆！或者你會問，Pick-up相對於SUV有咩好？若追求實用，只是一個特大貨斗已經冇得輸，加上強悍的越野性能及高離地距，路面通過能力贏幾條街。D-MAX Deluxe的設計很適合一般用家，車尾貨斗加裝了上揭式油壓尾冚，不但有擋雨作用，尾冚更可獨立鎖上，變相有防盜功能。咪以為咁大個尾冚要好大力先開到，實情只要輕力扭動鎖頭，尾冚就會自動揭起，女仔都可以自己搞掂，唔使求人。

鬼面罩加上大面積電鍍裝飾，望落非常醒神！

車頭大燈提供明亮的照明，並可調校照射角度。

車窗已加上雨擋，下雨天時都可開窗通風。

貨斗容量大清理亦易

Deluxe版D-MAX採用Double Cab設計，並以五座位布局，貨斗雖冇雙座版咁大，但長度仍有1,480mm，載物量完勝SUV，鍾意玩單車、滑水或獨木舟等戶外活動的朋友，呢部車確是相當啱使，可帶埋私伙架生周圍去。值得一提的地方是貨斗用防水物料製造，放幾濕、幾污糟的物品都冇有怕，搵水一沖就乾淨番晒，打理易過地氈多多聲。外觀上，D-MAX Deluxe的前半部望落同SUV沒大分別，鬼面罩、霧燈及腳踏等部分都加入鍍鉻裝飾，點睇都唔似商用車，貨斗一次過運幾部單車都仲得，怪不得咁多人買來當悠閒用途，毫無疑問是集經濟、實用及多用途於一身。

裙腳位加裝銀邊腳踏，顯得分外型格。

側鏡殼加入電鍍裝飾，並整合了指揮燈。

車尾貨斗非常大，而且可加裝尾冚。

升級至六前速波箱

全新2017版D-MAX Deluxe為環保6型Pick-up，搭配的柴油引擎為1.9公升直四雙頂凸輪軸可變活瓣渦輪增壓，同時導入廢氣再循環裝置（EGR）及電子控制高壓共軌噴注系統（CRS），不但排放低，性能仲非常強勁，最大的馬力、扭力分別達到163hp/3,600rpm及36.7kgm/2,000~2,500rpm，試車時由彩虹開上飛鵝山，強勁低扭的優勢完全展現出來，配合預載的斜坡起動輔助系統（HSA），無論在斜坡起步或爬頭都非常輕鬆。同時，波箱亦由之前的AISIN五前速+/-自動波升級至AWE6B45-II六前速+/-自動波，多一個波檔不但可降低油耗，換檔時較少的轉數落差亦帶來更佳舒適性，作為商客兩用車十分稱職。

後座空間寬敞，三個座位均設有三點式安全點。

軚盤附設智能控制系統，可控制音響及通話等設備。

車廂設有多個儲物格，方便擺放雜物。

標準配備如私家車

買Pick-up當私家車用仲有咩好？當然仲有好多啦，唔止牌費、油費平啲，仲可泊私家車及貨車錶位，好處都幾多，不過要注意有2號牌（輕型貨車）先揸得，得私家車駕駛執照的朋友要考多個牌喇！D-MAX Deluxe搭載四輪驅動，駕駛者可因應實際路況選擇兩驅（2H）或四驅（4H及4L）模式，加上車身離地距高，足以應付嚴峻的崎嶇野地。現時，代理已將免匙系統、18吋軨、藍牙音響、後泊鏡、尾門兒童安全鎖等列為標準配備，基本上SUV有的，D-MAX Deluxe都畀到你。擔心一般私家車位唔夠泊？畀個數據你參考下，D-MAX的車身長、闊、高分別為5,295mm、1,860mm及1,795mm，闊及高度同MPV差不多，只是車身比較長而已。嫌一般SUV太悶，好似D-MAX Deluxe呢啲又型、又實用的潮車，會否是你杯茶？

1.9公升柴油引擎配上Turbo，扭力輸出十分強勁。	波箱設有六前速，並附設手動加減波功能。	原廠配上18吋輪圈，輪胎尺碼為255/60 R18。
車尾加裝了後泊鏡，倒車睇位更輕鬆。	免匙進入及啟動系統屬標準配備，帶來不少便利性。	波棍台設有四驅轉換器，駕駛者可自行選擇兩驅或四驅。