Honda Odyssey Supreme全方位識歎

坐大班椅煲碟睇戲

在港有售的Odyssey有3個型號，除了Prestige版設八座位外，Premium及Supreme都是七座版，三排座椅以2+2+3布局，中排更用上Ottoman大班椅，附設小腿軟墊及扶手，乘坐舒適性仲正過自己屋企張梳化，長途車又有咩好愁？話咁快就去咗搵周氏公公捉棋啦，瞓唔着仲可透過頂置的9吋屏幕睇電影，值得一提的地方是後排設有HDMI輸入，換戲不求人。外觀上，2017 Supreme版的鬼面罩及霧燈都換上型格的亮黑色，賣相較過往的鍍鉻設計更匹配Odyssey的運動形象。同時，車身兩邊的倒後鏡亦加入了發熱功能，並在鏡面塗上有跣水作用的Coating，有助減少起霧及水點積聚，喺潮濕、多雨的香港尤為實用。

軚盤可作多角度式調校，而且可控制通話系統。	後座乘客都有不錯的腿部空間，唔會話好逼狹。	第三排座椅可收藏在地台底，以騰出更大的載物空間。

電揭背門具記憶功能

2017款Odyssey Supreme的車廂設備亦有所升級，八向式電動調校駕駛席增設2組位置記憶功能，並為前排乘客位加入電控，豪華程度更勝從前。香港部分停車場的樓底不足兩米，有些更低至1.7米，一個不留神，電動上揭式尾門好容易會撞到通風槽、消防喉等裝置，為減少這情況發生，廠方為新Odyssey Supreme的電動尾門特別加入記憶功能，車主可因應常用的停車場樓底預先設定尾門打開高度，以後尾門揭起至預設位置就會停，咁就唔怕因一時大頭蝦而撞毀天花設施。此外，原廠導航更支援廣東話導引，而且可用電話號碼搜尋地址，要搵地方話都冇咁易。

車頂裝上9吋屏幕，隨時隨地都可欣賞心愛電影。	引擎動力輸出線性，耗油量亦不高。	後側窗備有遮光簾，擋陽光之餘又可增加私隱。

鳥瞰影像睇位一流

Odyssey的車長有成4.83米，好長又稱唔上，不過駛進狹窄停車場都唔叫得輕鬆。自問睇位唔叻的朋友又唔使太擔心嘅，皆因車上已預載了多角度泊車鏡頭，拍攝得來的畫面會傳送至中控台的觸控式屏幕上，可提供全方位的360度鳥瞰影像，車身四周距離阻礙物位置都可睇得一清二楚，在大潭道水壩遇上重型對頭車都唔使慌失失。港版Odyssey均搭載2.4公升i-VTEC引擎，最大馬力、扭力輸出分別為185ps及235Nm，配合七前速CVT波箱，加速流暢且線性，油耗表現相當理想，根據JC08 H+C Mode，每公升油可行13.7km，$1.1/km都算係咁。現時，代理還將側窗遮光簾、天窗、泊車輔助系統及自動感應LED頭燈等列為標準配備，可以話相當足料。

規格表

車型：五門七座位MPV

引擎：直四i-VTEC

容積：2,356c.c.

最大馬力：185ps/6,400rpm

最大扭力：235Nm/4,000rpm

傳動：七前速CVT自動波

驅動：前置引擎、前輪驅動

懸掛：（前）麥花臣式、（後）H形扭力桿

車身體積：4,830×1,820×1,695mm（長×闊×高）

撰文：鄭浩文

攝影：張錦昌

查詢電話：2380 2231（合群汽車）