愈難愈愛玉桂山

路段陡峭兒童不宜

要征服玉桂山，再經過連島沙洲去鴨脷排燈塔，對有經驗的山友嚟講並唔算難，不過沿途都是沒有修葺的天然路，若平日冇行開山或做運動，只是抱住人去我又去的柴娃娃心態，咁呢度就唔多啱你，尤其諗住帶埋小朋友登山的父母要多加注意，呢段路絕對兒童不宜！近年，香港掀起行山、露營熱潮，好多山友早已行勻香港四徑，悶悶哋想發掘新地方、又要交通方便，路程短短地嘅玉桂山確是好選擇，喺港鐵利東站一出就係商場，可以先搵間餐廳醫個肚、買定適量糧水才出發，帶漏嘢都可即時補給。經過鴨脷洲街坊學校及配水庫遊樂場入口，步行數分鐘便會見到鴨脷洲（海水）配水庫，登山入口就在鐵絲圍網的左方，非常易搵。

乘坐港鐵往玉桂山，可在利東站B出口出。	經過鴨脷洲配水庫遊樂場入口再前行2分鐘，便到達登山入口。	見到鴨脷洲（海水）配水庫，沿着鐵絲圍網旁上山就對。

做好防曬帶足糧水

進入登山路段後，一直去到鴨脷排燈塔都是崎嶇野路，期間更需要小量攀爬，加上沿途冇乜樹，要有心理準備暴曬數小時，謹記要帶夠水及做好防曬，飲用水最少都要1至1.5公升，炎熱日子要預更多，千祈唔好貪輕懶拎，缺水的後果可以好嚴重。

分岔口有左、中、右三路，中路是「有繩路線」。

沿路都是沒有修葺的天然路，建議穿着行山鞋。

路邊麻繩不宜借力

沿配水庫圍網旁的小徑上山，不久便會見到分岔路，左、中、右三路都是登頂路線，今次揀最熱門的中路嚟行，睇吓難度去到邊。老實講，人稱「有繩路線」的中路，其實都幾崎嶇、坡度又大，每檻上一步都幾費力，雖然有人在部分路段釘了麻繩，實情卻危機四伏，很多地釘不是鬆脫就是甩掉，當日見不少遊人上、落山靠晒條又霉又舊的麻繩借力，見到都覺得牙煙，寧可行吓抖吓慢慢上都唔好過分依賴。上到玉桂山頂，景觀相當遼闊，海洋公園、南丫島以至南中國海景色盡入眼簾，過了標高柱再向南行，就會見到連島沙洲及鴨脷排，燈塔位置就在鴨脷排的最南方，想扮文青影相，要再多翻一個山啊！

很多地釘不是鬆脫就是甩掉，不要過於依賴麻繩借力。

玉桂山頂高196米，南丫島、香港仔及海洋公園盡在眼前。

大潮會淹沒連島沙洲

前往鴨脷排，必先從玉桂山頂下降至海平面的連島沙洲，其中有一半路都相當陡峭，甚至要坐住咁落，莫講話要帶住小朋友，冇行開山嘅大人都唔係咁易應付，落雨及潮濕日子隨時跣到一仆一碌。落到連島沙洲，環境係幾正嘅，不過垃圾就多咗啲喇，有啲殺風景。還要留意的地方是沙洲在天文大潮的日子有機會淹沒，唔想過咗去返唔到轉頭，記得揀啱日子及Check清楚潮汐資料，被困要人救就唔好啦！走過連島沙洲，再登上68米高的鴨脷排並繼續向南方下降至海邊，便會見到白色的燈塔，坐在岸邊歎海風，寫意到爆。有啲人回程會玩「綑邊」，但危險度實在太大，不建議咁做。據行山人士講，假日不時有街渡喺鴨脷排兜客，安唔安全、有冇保險就答唔到你，搭唔搭自己衡量。

由玉桂山頂下降至連島沙洲，路段非常陡峭。	連島沙洲在天文大潮的日子有機會淹沒，出發前記得揀啱日子及Check清楚潮汐資料。	通過連島沙洲後，沿白色箭嘴方向走便可登上鴨脷排。
玉桂山及鴨脷排都是玩「綑邊」熱點，但沿海邊走有相當危險性。	鴨脷排的最南端有白色燈塔，不少人都會喺度取景拍攝。	當日見到不少人玩攀岩，惟部分人安全設施不足。

撰文、攝影：鄭浩文