青島直擊！測心跳鬥可愛創意錶準

提起Epson，很多人會想起打印機，其實廠方研發手錶、投影機等亦享負盛名。亦剛於青島舉行的「2017愛普生創新大會」（2017 Epson Innovation Days），廠方就以環保為理念，展示了大量生活和商業範疇的創意產品，當中以Runsense系列運動手錶最注目，可監測心跳及記錄運動數據。同場另有卡通電子錶、AR眼鏡等，將創新科技融入生活之中。

當戴住PS-600踩健身單車時，屏幕會顯示心跳率以提高訓練效果。

跑步踩車記錄數據

場內最注目可說是運動手錶展區，備有多款Runsense系列新錶供試玩，當中有專為跑步而設的SF-850，內建高精度的GPS定位系統，背面植入感應器作監測心跳率、步數及睡眠質素等，現場工作人員表示其精準度高達99%，仲可配合第三方Apps記錄運動數據，跑友必備。展區還擺放了健身單車，用作示範另一運動手錶PS-600，屏幕會實時顯示用家的心跳率，畀各位於健身室訓練時使用。另一款SF-720手錶就適合越野跑手使用，在使用GPS定位模式下仍有30小時續航力，不過就唔識得偵測心跳。

女生至愛卡通錶

運動手錶展區旁邊展示了Smart Canvas主題手錶，以巨型「吉蒂貓」布置吸睛，仲可以畀入場人士影相留念，系列最大特色係用上唔同主題設計，包括Hello Kitty、Little Twin Stars、OTTAIPNU等，顏色鮮艷又可愛，而且300dpi高解像度錶面，畫面帶有電子書感覺，在陽光底下睇錶都唔會刺眼。手錶還可更換主題，並支援橫直轉換介面，戴上手或放喺枱面都一樣睇到日期、時間和溫度等。

Epson向來有推出運動手錶，當中Runsense系列的SF-850（右）和PS-600（左）提供心跳率檢測功能。

Epson向來有推出運動手錶，當中Runsense系列的SF-850（右）和PS-600（左）提供心跳率檢測功能。

SF-850主要針對長跑而設計，內置GPS系統並擁有20小時續航力。

手錶背面備有雙感應器，難怪監測心跳率的精準度達99%。

除了記錄心跳數據，仲可計埋步數、卡路里、距離、速度、睡眠質素等。

配合第三方手機App，能夠顯示詳細的運動數據，從而改善訓練效果。

Smart Canvas主題手錶展區，擺放了巨型「吉蒂貓」布置畀大家影相。

卡通手錶有唔同設計，而且可橫直擺放及更換不同主題。

AR智能眼鏡玩遊戲

廠方年初曾發布可接駁航拍機的BT-300智能眼鏡，估唔到現場咁快就有新一代BT-350智能眼鏡現身，眼鏡框加入彈性設計，就算唔同頭形嘅人士都戴得舒服。而BT-350同樣可連接航拍機作監控同埋玩AR擴增實境，場內展區就提供一個四方盒，當戴住BT-350智能眼鏡時，四方盒就會透過AR技術化身成3D迷宮方塊。工作人員解釋，BT-350可做到旅遊導覽、遠程維修等用途，主要針對商務範疇，預計今年5月於香港發布。

低功耗晶片節能環保

話明今次大會以環保為主題，現場當然有不少環保方案，例如廠方製造出低功耗晶片，唔單止慳電節能，用途仲相當廣泛，例如安裝在智能機械人後，就毋須經常充電；又或者應用於共享單車服務，裝嵌到單車上令定位更精準、解鎖更快速。還可安裝在汽車的儀錶板、GPS系統、車Cam、後波雷達等，各位唔好以為只係概念產品，其實節能晶片已在實際產品上取得成功。