Porsche Panamera 4S夢幻升呢

用料升級提升互動

於2009年推出的Panamera在全球有15萬部的累計銷量，單是中國市場已佔了總銷量的28%，中、港、澳合共交出超過4.3萬部，消費者相當受落。隨着更豪、更先進的新一代車型到港，勢必進一步刺激保時捷在區內的銷情，平治S-Class、寶馬7系的準買家，唔知又會否轉軚呢？事實上，全新Panamera在每一項細節上都經過重新開發及設計，用料比上代高成個Grade，如率先抵港的Panamera 4S，馬力便提升了20hp，並改良了底盤及人車互動系統，娛樂、通訊及輔助系統的應用都得到大幅擴展，將這部四門GT帶進全新的數碼化年代。

車廂用料及設備都比上代豪，感覺升晒Grade。	錶板及中控台全面數碼化，觸控式面板在多方面都取代了實體鍵。	PDK波箱升級至八前速，巡航時更省油。
前座設有14方向電動調校，並附設位置記憶功能。	行車模式選擇器整合在軚盤右下方，就手易用。	雙獨立後座椅設計，看上去別具運動氣息。

馬力增加油耗卻減

早期的Panamera 4S是搭配4.8公升V8引擎，油耗表現並唔係咁理想，直到後期換上3.0公升V6雙渦輪增壓引擎才有較為明顯的改善。如今二代4S的2.9公升引擎再進化，性能及燃油效率都更勝從前，這副全新的六缸引擎採用中央渦輪布局，兩個渦輪增壓器整合於汽缸組中央，空氣經由雙分支管路導入至各個渦輪增壓器及燃燒室，從而達到提高引擎反應的效果，最大馬力增加至440hp，不僅成為歷來性能最強的Panamera 4S，更是最慳油的一部。根據NEDC，每百公里平均油耗只是8.1至8.2公升，比上代用少11%油，名副其實的快咗、又慳咗！當日試駕的版本還裝配了Sport Chrono Package，0~100km/h只要4.2秒，直路加速同911 Carrera有得Fight！

車頂設置玻璃天窗，前及後座乘客都可享開揚景致。	後排設有獨立送風口，確保每個角落都有涼風送至。	後擋風玻璃都設有遮光簾，有助增加私隱。
新引擎更好力省油，Panamera 4S的平均油耗僅8.1~8.2L/100km。	放大圖片	LED頭燈屬標準配置，而且搭配4點式日間行車燈。

車身長攻彎卻靈活

保時捷啲車好彎向來都唔使點懷疑，莫講話911、Cayman呢啲純種跑車，其實車長逾5米的Panamera都一樣咁好玩，標配的電子避震與啟發自918 Spyder及911 Turbo的後輪轉向系統，不但將跑車的精準轉向及操控帶入GT車型，就連巡航舒適性都兼顧得到，在起伏的石澳道試車，無論快/慢車都絲毫沒有半點論盡感，坑洞所造成的彈跳也被懸掛過濾得七七八八，乘坐質素相當有水準，在新款Panamera上，做駕駛者或乘客都是一種享受。如果要在Panamera、S-Class同7系之間作選擇，應先問一問自己想要啲咩，想部車跑得、平時又自駕居多的話，那就揀「波子」吧，起碼冇咁易被人當司機，對不？

測試車配上21吋911 Turbo Design輪圈。	中控台屏幕不但可顯示導航及多媒體資訊，甚至可控制尾翼及車身升降。	裝配了360度環迴鏡頭後，周邊環境一目了然。

儀錶板中控台數碼化

新款Panamera展現一種全新的顯示及控制概念，儀錶板及中控台全面數碼化，觸控式面板在多方面已取代實體鍵，行車模式、尾翼及車身升降，以至導航及娛樂系統等全部都可在屏幕上控制，唔少得的仲有360度環迴鏡頭，同埋支援Apple CarPlay啦！至於駕駛者前方的錶板，除了中間的轉速錶保留傳統的機械指針式設計外，兩側的儀錶已換成7吋屏幕，幾乎車上諗得出的資訊都可顯示，地圖甚至可放至7吋咁大，睇得仲清楚過用手機。代理指，新增的全景式玻璃天窗已列為標準配置，另可選配按摩座椅、車廂照明及Burmester 3D頂環繞音場系統等。

儀錶板除了中間的轉速計保留傳統的機械指針外，兩側儀錶都換成7吋屏幕。

輕易便可透過藍牙將手機與車載娛樂系統連接，而且支援Apple CarPlay。

Porsche Panamera 4S SPECIFICATION

車型：四門四座位GT

引擎：V6雙渦輪增壓

容積：2,894c.c.

最大馬力：440hp/5,650rpm

最大扭力：550Nm/1,750~5,500rpm

傳動：八前速PDK自動波

驅動：前置引擎、四輪驅動

車身體積：5,049×1,937×1,423mm（長×闊×高)

售價：$1,893,000起

撰文：鄭浩文

攝影：張錦昌

查詢電話：2926 2911（Porsche Centre HK）