一人一票選Air Max

日前，投票結果正式出爐，由來自洛杉磯嘅Sean Wotherspoon大熱勝出，其設計是將Air Max 97鞋面加在Air Max 1鞋底。據講鞋面彩色燈芯絨設計，靈感源自Nike 80年代推出的燈芯絨帽，無論這是否閣下心水款式，反正結果是全民投票選出來，唔到你唔服！

Instagram：@sean_wotherspoon

Sean Wotherspoon設計的鞋款用上Air Max 97鞋面（後）及Air Max 1鞋底（前）。

鞋款設計素材之一源自Nike 80年代的燈芯絨帽。

兵器狂迷鑄造噴火十王劍

平時打機，尤其是打RPG及Action Role Playing類別，大家勢必花時間、功力，甚至課金，取得神兵利器，以便過版。原來世界上真係有一班兵器狂迷，唔只對古代嘅刀槍劍戟着迷，甚至對動漫世界、科幻電影嘅冷兵器中晒毒，實行自製兼拍片，向全球公諸同好。講嘅係YouTube節目《MAN AT ARMS》，向日系經典動畫《百獸王》，即係美版《Voltron》入手，唔只實物還原成最強兵器「十王劍」，測試員仲Cosplay百獸王上身，想知把劍利唔利？大家要睇片搵答案了。雖然團隊花咗唔少工夫做劍，不過細緻度似乎差少少，唔怪得有人話過，世上最高質嘅刀劍，都係嚟自東瀛嘅兵器匠（你知日本人認真起上嚟唔係人咁品），話雖如此，製作團隊加入原創功能，令呢把土炮十王劍可以引火上身，咁有Gimmick，補番唔少印象分。

YouTube：http://bit.ly/1U9oiGG

震到乾淨　旅行洗衫法寶

唔少人去旅行都會執十套八套衫替換，而着過的舊衫冇得清洗，混雜異味和污漬又真係幾難頂，不過如果有網上熱話的超聲波便攜洗衣器，就能解決旅行隨時洗衫的問題。只要將洗衣器和衣物放入盛滿清水的盤中，加入小量洗衣粉或洗衣液，洗衣器便會透過超聲波技術不斷震動，令衣物上的污漬沉澱，大概震30分鐘左右，即可讓衫褲變得光潔如新，相當神奇。洗衣器只要利用USB接駁「尿袋」即可驅動，加上Size只有手掌般大，而且重量僅150克，帶去旅行既慳位又方便，不過，每次只可以洗一件衫咁大把！

網址：http://bit.ly/2owNYyP

YouTube：http://bit.ly/2nhJYSC

瀛妻必殺技綁住老公個胃

成日話要留住老公個心，其中一樣必殺技是「留住佢個胃」！加上人始終是視覺動物，食物除了味道外，賣相亦要出眾才能將目光留住。日本有位人妻深明此道，於IG分享DIY的精緻卡通便當；食材多以蔬菜為主，而且色彩繽紛，吸睛之餘又健康。便當用上多款卡通人物之餘，還不時以小鳥做主角，原來夫婦二人養了一隻可愛的小鳥。雖然男人老狗未必喜愛卡通造型便當，但看到老婆的心思和精巧手藝，未知會否有小小感動呢？

Instagram：@kinakobun

洛杉磯雪糕博物館4月登場

上年紐約的Meatpacking區於暑假期間舉行了名為Museum of Ice Cream的期間限定展覽，特色是以雪糕及其周邊食品炮製出連串創意展品，如放了1億粒彩虹糖的「泳池」、利用雪糕勺造型炮製的搖搖板、還有甜到膩的朱古力房及雪糕筒電燈主題房，以及雪糕試食專區等，頭5日已售清了3萬張門票，吸引力驚人！展覽將會載譽歸來，選址於洛杉磯Arts District的2018 East 7th Place，於4月22日至5月29日期間舉行，令人驚喜的是，會場面積較紐約大4倍，內裏會有10個相關裝置，如果上年錯過了的話，今年記得要去捧場。

面對這幅甜筒牆，好難唔笑得燦爛。

上年最令人期待的彩虹糖泳池，帶來與別不同的「暢游」感受。

網址：www.museumoficecream.com

玩味創意海報向電影致敬

電影不僅是娛樂，更是一部可觸及深層話題的藝術品，亦可以是歷史溝通的橋樑。影迷可以用不同方式向心愛的電影致敬；有人撰寫影評、有人翻唱配樂、也有人重新繪畫電影海報等，其中4resdrawing便是以繪畫電影海報來向心愛電影致敬。其畫風生鬼，顏色鮮艷，呈現了電影海報的另一種美態，而選材也以藝術電影為主，以失意音樂人為故事的《Begin Again》、描述人性黑暗面的《Gone Girl》以及最近贏得奧斯卡最佳男主角的《Manchester by the Sea》也值得細味！

Instagram：@4resdrawing

異國初戀：烏克蘭人氣文青

時下烏克蘭美少女流行超濃一字眉及豐唇妝容，亞洲人如你我審美觀不一，未必識欣賞。但是這位烏克蘭美少女Nastya Lenskaya（IG：@nastencha）的打扮竟然出奇地符合香港現時流行的「文青」感覺，清純得嚟又突出到本身靚樣，佢仲好常戴文青黑框眼鏡，好有初戀Feel！佢現時係一位YouTuber，喺網絡上人氣超強，平均影片點擊超過400萬，分分鐘紅過香港唔少明星！

撰文：副刊組

相片來源：互聯網