鞋頭今季要「灰鞋」？
雖然灰色波鞋的人氣，唔似得幾年前NB996大熱時咁勁，但灰色始終是時裝界其中一大基礎色調，所以繼續被各路潮牌重用。例如Saucony Originals和Nike Jordan Brand最近就決定繼續「灰爆」。
兩大品牌 齊齊「灰下去」
前者強勢推出Dirty Snow II系列，顧名思義當然是以冬季落完最後一場雪的雪花質感及灰白色景象為靈感，配以藍、黑等主流色調，非常易襯。加上融合品牌3大經典型號Shadow 6000、Grid SD及Grid 8000 CL於新系列中，令每對鞋有型得來格外舒適。
至於Nike Jordan Brand方面，新作雖仍未有確實的推出日期，但已經在全球掀起狂熱討論。事關品牌找來在潮界呼風喚雨的美國「精蟲」藝術家Kaws合作，推出全新聯乘版Air Jordan 4。除以灰色絨面為主物料外，鞋身亦加入暗紋圖案，鞋踭部分則加入Kaws最經典的Companion「孖X」圖案，設計低調中帶有潮味，令鞋頭流晒口水。雖然即使玩限量推出都未必能超越Eminem Encore版本，成為史上炒到最貴的Air Jordan 4（這對鞋當年僅推出50對），但要炒高過UNDFTD當年那對傳奇軍綠色波鞋，都唔係話無可能！
撰文：張榮熹
查詢電話：（A）2711 9600