人氣車Cam日夜實測畫質異能對決

Thinkware F770 韓迷推崇

近年好多車主都鍾情韓國品牌嘅車Cam，如早年嘅BlackVue為網友推崇，近年輪到Thinkware火速冒起，而F770屬於廠方高階型號，擁有140度廣角全高清鏡頭，唔少車主都讚其拍攝效果出眾，加上Made in Korea信心有保證。

規格表

鏡頭：219萬像素（140度可視角）

解像度：1,920×1,080

屏幕：不提供

記憶體：支援最大64GB microSD

體積：110×60.41×31.75mm

重量：131g

LG BBDB-FF02E 觸控屏幕

來自韓國嘅LG，其子公司LG Innotek都有推出車Cam，當中旗艦型號BBDB-FF02E於韓國製造，配備136度可視角全高清鏡頭及3.5吋篤芒設計，不但攝錄畫質出眾，操作設定仲好簡便。

規格表

鏡頭：200萬像素（136度可視角）

解像度：1,920×1,080

屏幕：3.5吋輕觸式

記憶體：支援最大64GB microSD

體積：112×68×31mm

重量：110g

Mio MiVue 688D 台系新寵

來自台灣嘅Mio向來主力生產GPS導航產品，2010年開始研發車Cam，發展至今有雙鏡頭、電單車專用等款式，尤以MiVue 688D最具人氣，支援1,920×1,080解像度攝錄之餘，仲有胎壓偵測、雙卡槽等輔助功能，夠晒實用。

規格表

鏡頭：200萬像素（130度可視角）

解像度：1,920×1,080

屏幕：2.7吋

記憶體：支援最大128GB microSD

體積：90.2×49×35.2mm

重量：102g

Round 1：日夜鬥畫質

車Cam最緊要係攝錄質素，今次3支Cam均用上日系感光元件，可拍到1,080p全高清影片。喺日光下於吐露港駕車測試時，發現3款Cam都可清楚拍到10米範圍內嘅前車車牌號碼，兩支燈柱位前嘅路牌，放大後連細字都可清楚辨識，當中以LG BBDB-FF02E的成像顏色最自然，而Thinkware F770畫面則帶點灰，Mio 688D嘅色彩有點偏綠。日光之下當然考驗唔到車Cam威力，輪到夜間喺沙田一帶穿梭，基本上有街燈和車頭燈照明下，3支Cam都可清楚拍到前方車牌，但離遠的路牌字體就變得鬆散，而Thinkware F770在雜訊處理方面較佳，成像細節有較好表現。

駕車當日下着微雨，Thinkware F770拍攝路面狀況依然清楚，但畫面帶點灰矇矇。	Win 支援Super Night Vision技術，雜訊控制不俗，夜攝表現最佳。	Win LG BBDB-FF02E畫面顏色最自然，車輛及路面狀況一覽無遺。
前方車輛的車牌雖然清晰，但夜間畫面雜訊較多，而放大路牌字體顯得鬆散。	Mio 688D整體畫面略嫌偏綠，幸好以清晰搭夠，放大路牌字體仍辨認得到。	夜間表現中規中矩，街燈樹影等混亂燈光下曝光依然正常。

Round 2：安裝鬥靈活

一般前Cam的安裝相對簡單，直插車廂內的點煙器取電即可，一旦牽涉後Cam取電便較為麻煩。今次3款車Cam改良了安裝方法，前Cam依舊接駁點煙器，後Cam再以附送的USB長線連接前Cam即可運作，毋須獨立拉線咁麻煩。扣分位反而在車Cam安裝時，Thinkware F770及LG BBDB-FF02E均只用上3M膠貼，雖然黏得好穩陣，但安裝位置要非常精準，若黏貼後想轉位隨時留有膠痕。要讚是Mio 688D採用吸盤設計，裝拆換位相對容易。

Thinkware F770不設屏幕，可透過手機App進行設定；而安裝主要靠3M膠貼。	LG BBDB-FF02E採用3.5吋篤芒，前後Cam安裝都算容易，3M膠貼的黏力幾強。	Mio 688D的後Cam畫面會同步顯示於前Cam的左上角，加上吸盤安裝容易！

Round 3：操作鬥異能

車Cam基本操作大相逕庭，惟Thinkware F770機身不設屏幕，調校設定時需要靠按鍵及語音提示，如果要睇片的話必須經Wi-Fi連接《Dashcam Viewer》手機App，稍為不便。LG BBDB-FF02E則備有3.5吋觸控屏幕，操作與一般Smartphone無異，篤芒反應靈敏。而Mio 688D 嘅2.7吋屏幕雖然唔係篤芒，但側面提供5個按鍵，並採用繁體中文介面，適合港人使用。

《Dashcam Viewer》App為F770提供實時預覧，用家還可調校拍攝設定。	LG BBDB-FF02E要外接附送的GPS模組，可記錄車速，惟沒有快相語音等提示功能。	DRAW Mio 688D內置測速及前車距離過近等提示功能，不過用上普通話發聲。

特異功能方面，3款車Cam都支援「泊車模式」，就算車主熄匙停泊，當車Cam感應到前方有人或汽車經過時都會拍攝，有效杜絕一眾「Hit & Run」人士。值得一提，Thinkware F770及Mio 688D原生已內置GPS模組，而LG BBDB-FF02E則用上外置GPS模組，前兩者還提供快相語音提示功能。

專家教路

身為車主嘅香港資訊科技商會榮譽會長方保僑（Francis），曾經使用過BlackVue及iRoad等車Cam，他建議車主起碼要安裝前後兩支Cam，慎防常見嘅前後車意外。「選購車Cam最好內置GPS功能，假若發生意外時可提供埋定位資訊。此外，車主要留意泊車模式的耗電問題，由於車Cam要長期接駁車內電池，建議用家將其低電壓選項調至最高，減低電池被耗盡的風險。」

總結：Thinkware畫質清晰 Mio功能齊全

今次測試3款人氣車Cam各有優勝之處，如果追求畫質清晰度的話，Thinkware F770係不錯選擇，小記最Buy佢嘅快相提示功能，定位準確之餘，仲用埋廣東話發聲，相當親切。如果需要測速照相預警、車道偏移警示、前車碰撞警示、大燈開啟提醒等功能，則可選擇Mio 688D，用家更可配搭胎壓偵測套件使用，集多功能於一身。

撰文：林子聰

攝影：盧展程

查詢電話：（a）9700 8004、（b）3619 6500