Airbar篤芒變法即插即用

依家手機、平板全部用晒篤芒操作，有時用番手提電腦打字反而唔習慣。其實想玩篤芒好簡單，有條Airbar就搞掂，佢嘅外形似足一條磁石條，只要以USB連接電腦，再將Airbar放喺屏幕下方，屏幕就會即時支援觸控功能，無論篤芒上網或者玩遊戲都冇難度。Airbar嘅運作原理係向屏幕發射光線，從而感應用家嘅手勢指令，小記以15.6吋筆電實試時，進行點擊、撥頁、放大、縮小等觸控操作都反應靈敏，玩樂或工作更加方便。值得留意是它提供13.3吋、14吋及15.6吋3個型號，支援Win 8及Win 10系統。