譚淇淇玩盡手持雲台4招直播博Like

第1招：自拍棍有人有景

唔少人做網上直播都係拎住部電話以前置鏡頭自拍，搞到塊面霸佔晒成個畫面，譚淇淇指：「直播時不妨加支自拍棍，再以高角度影落嚟，不但會影到塊面尖啲，而且眼又大啲，最重要係可以見到背景，方便直播介紹。」

第2招：LED燈補臉光

直播係一場Live Show，大家都唔想將醜陋嘅一面畀觀眾睇到，譚淇淇笑言：「拍攝時嘅光線好重要，尤其喺夜晚或昏暗環境，手機影出嚟好多Noise，所以穩定器應該要夾上LED燈補光，Fans就唔會睇得咁辛苦。」

雖然拎住支自拍棍較為笨重，但會影到塊面尖啲又靚啲。	用自拍棍後唔使淨係影到塊面，仲能夠影埋背後嘅景物。	直播時不妨在穩定器旁邊夾上LED燈補光，好似這款DJI出品的雲台燈售$689。（a）

第3招：收音咪更靚聲

喺街邊行邊直播，收音係另一問題，四周人多嘈雜時，粉絲未必聽到你講咩，譚淇淇表示：「有時出外景直播，經常會嗌到沙聲，所以間中都會插上收音咪，有線咪嘅好處係靚聲啲，但就要拖住條線嚟行；而無線咪就方便啲，適合直播時跑跑跳跳嘅我，售價由數百至過千元不等，豐儉由人。」

唔加LED燈塊面當堂黑晒（上），加番LED燈後明顯更添光彩（下）。	喺人多嘅環境下直播，最緊要加收音咪，咁就唔使嗌到聲沙。	譚淇淇好早就玩17直播，粉絲有8萬幾人，另亦試過facebook Live、Instagram Live等。

第4招：唔好有Dead Air

想多啲人睇你直播，最基本要有穩定嘅網絡，但內容都好重要，譚淇淇話自己好鍾意吹水，「直播試過最長達4小時，當中真係要不停講嘢，因為一有Dead Air就會令人唔想睇，最好同粉絲有多啲交流。」

同場加映：三軸手持雲台推介

想知手持雲台夠唔夠穩定，一定要帶埋自己部電話去試，Zeta店長Zen Ding表示：「揀手持雲台時先要定下Budget，以及諗吓平時會點用，例如用嚟直播、影小朋友等，試機時不妨跑住或跳住嚟玩。而市面熱賣嘅型號有DJI Osmo Mobile、智雲Smooth 2和Feiyu Tech SPG。」

Zen Ding早前喺YouTube拍過一條手持穩定器大對決影片，搜尋關鍵字「ZETA玩#010」就搵到。	DJI Osmo Mobile 自動追蹤 具備標準、直拍、懸掛等手持模式，配以藍牙連接《DJI GO》手機App，直播時只要觸控手機屏幕拉動綠色框範圍，雲台即會全程跟住你追拍，電池續航力有4.5小時。售價：$2,299（a）	智雲Smooth 2 神速反應 手柄備有五向操作桿，加上Honeycomb處理器開機反應快和穩定性高，並可透過藍牙連接手機App操作，支援橫拍和直拍兩種玩法，續航力可達5小時。售價：$2,000（b）
Feiyu Tech SPG 一機兩用 本身是針對手機而設計，但跟機附有GoPro夾具，適合手機及GoPro兩者使用，並引進智能直拍模式，打直拍片時快捷穩定，加上可以360°旋轉，玩全景拍攝更方便。售價：$2,180（b）

知多啲：YouTube唔係人人可以直播？

雖然YouTube App剛新增流動直播功能，但現階段唔係人人都可以玩，只供超過10,000頻道訂閱的YouTuber試用。而YouTube網頁版及Android版亦引入「Super Chat」收費功能，讓觀眾的留言在直播留言板上置頂，最低消費$5起，讓YouTuber可以留意到你。

撰文：黎子豪

攝影：張錦昌

查詢電話：（a）3589 4189、（b）2688 5366