舊化波鞋瘋行潮界

波鞋界力推「舊化運動」

近年，時裝人的念舊程度更誇張！他們怕大家難搵原版古着，又驚大家要花時間將原版Deadstock着到舊，於是索性在製作時已幫你進行舊化程序。而呢啲所謂舊化工序包括：重洗水、醋染定色、披口破損或直接用筆去塗污鞋身，甚至一啲你諗都諗唔到的方法都有。雖然時裝界早就流行「舊化設計」，好似早期的COMME des GARÇONS KAPITAL，到近代的日牌如UNDERCOVER及TAKAHIROMIYASHITA The Soloist.都玩舊化玩得出神入化，但在波鞋界咁大鑼大鼓推動「舊化運動」真係近年至見，仲「瘋」行世界各地，備受鞋頭追捧！

將舊化波鞋風氣炒熱的巴黎世家「Triple-S」波鞋，將於今年下旬推出，令鞋頭期待！	提起古舊，日本的Boro式拼貼工藝也令人難忘。Vans與日本著名品牌FDMTL早年合作推出的一系列拼布球鞋，也屬於一種罕見的舊化模式。	Converse作為受歡迎的古着波鞋品牌之一，在舊化熱潮中一直擔當着重要角色，好似它跟美國時裝設計師兼搖滾樂發燒友John Varvatos的長期合作系列，便是品牌在「扮舊」方面的最佳典範！
這款Puma Suede經典型號的舊化處理雖及不上其他時裝品牌的出品，但就勝在價格相宜，作為入門之選也不錯！	Nike推出的舊化波鞋雖不及其他品牌，但既然是波鞋界的龍頭，就點都會有一兩款設計看門口。以這款Nike Terminator Khaki Brown為例，啡色鞋面上加上「仿刮花」的設計，別具玩味精神。	受Chuck Taylor All Star影響的波鞋多如天上繁星，由The Soloist. 聯乘 UNDERCOVER於2012年聯手打造的波鞋正是表表者之一。其皺褶面料加上磨爛邊位，令這對鞋極具Kurt Cobain神髓。

「Triple-S」舊得徹底

講到近日最受注目的舊化波鞋，首推來自Balenciaga FW17男裝系列的「Triple-S」波鞋。呢對鞋係時裝界人氣王Demna Gvasalia的最新創作，大大舊的重裝外形，配上極具分量的三層中底設置已夠吸引，但都唔夠其舊化設定搶眼。除了鞋身滿布人為污漬外，三層鞋底膠更被刻意舊化成陳年的熏黃色。由於呢對鞋的舊化玩得太出色（行外人睇落以為係對臭鞋，但行內人一眼就分得出係刻意舊化效果），令到產品未正式推出已引來大量潮人問津，同時又令到品牌風行多年嗰對Arena都要讓路！不過話時話，對於這些舊化波鞋，大家又記得幾多和擁有過幾多對呢？依家就同大家細數經典，一齊回顧吓！

講到近期玩舊化玩得最徹底者，一定首選意大利嘅GOLDEN GOOSE波鞋。Old School又簡潔的鞋面，有一點點淡淡的污漬，數量不多不少，恰到好處。	要數擅長於Old School鞋面上玩舊的代表品牌，近年也有Saint Laurent啊！	貴為「Con士」的最大對頭，Vans的舊化工藝同樣出色，它在2014年推出的Over Washed系列，便大玩重度舊化染色和洗水，一推出就於全球掀起搶購潮。

撰文：張榮熹

相片：互聯網