Move It健身器操出智Fit人魚線

香港蝸居專用

出街做Gym嘅最大難題係經常與人比較，畀旁邊大隻仔望住既自卑又尷尬！去年網上集資推出的Move It讓大家再無藉口。它由鋁合金及塑膠打造，組合後Size僅38.1×20.9×40.2cm，重約3kg，單手能整個舉起搬動，啱晒香港蝸居使用。整套裝置提供4種訓練器材，分別是阻力帶（Resistance Band）、健腹輪（Ab Wheel）、掌上壓器（Pushup Stand）及跳繩（Jump Rope），全部加起來可帶出41種訓練模式，同時照顧到帶氧運動及肌肉訓練需要。

動作做啱先計

聽落以上器材冇乜特別，但其最大賣點是備有智能手柄，充滿電夠用9天左右。手柄能安裝到4種器材之上，並內置3D陀螺儀、壓力計、射頻器及紅外線感應器，配以專用App可因應使用器材，自動識別運動類型，並同步計算次數、時間及卡路里燃燒量。PitStop Fitness高級教練Will試玩後表示：「佢嘅Sensor好準，例如用阻力帶向上舉，若手臂幅度唔夠或左右手力度不均，佢會唔計數。好多人怕自己健身會做錯動作，依家做啱先計數，變相有個教練指導你！」Will補充，透過Move It基本可訓練全身7大肌肉群組，包括胸、背、膊頭、二頭肌、三頭肌、腹部及大腿，帶來全身運動量。

Move It組合起來只有40.2cm高，適合香港蝸居使用。提供4種健身器材，分別是阻力帶、健腹輪、掌上壓器及跳繩，帶來共41種訓練模式。	系統能認出正跳、反跳、交叉跳等不同跳繩方法，但教練Will指室內空間不足容易弄傷膝部。	教練Will表示阻力帶能偵測手臂上舉幅度，適合初學者。

挑戰場鬥身形

女士又點睇呢？高級教練YY則很欣賞專用App設計：「App內提供節奏明快的音樂，可讓人投入運動之中。『挑戰場』則讓用戶與朋友及世界各地人士進行比併，做運動時冇咁悶。」專用App其他功能包括「訓練計劃」及「動態更新」，前者提供人魚線雕刻、甩掉拜拜肉等專業課程；後者則畀大家鬥貼靚爆身形相片呃Like！當然，Move It也非全無缺點，兩位教練不約而同認為它只適合初學者：「佢嘅阻力有限制，用戶唔可以再做重啲，若本身已有番咁上下Fit，想再健碩啲就未必啱用！」

智能手柄設有專用充電座，充滿電足夠使用9天，手柄上更有燈號提示電量。	可配合專用App使用，邊做運動邊監察次數、時間及卡路里燃燒量。	掌上壓器可分辨出雙手間距，教練YY指訓練效果比喺平地做掌上壓更佳，但難度相應提高。
內置「動態更新」功能，方便大家Show Off人魚線。	「訓練計劃」提供人魚線雕刻、甩掉拜拜肉等專業課程。	「挑戰場」讓用戶跟朋友比併運動進度，唔使一個人做運動咁悶。

撰文：陳志滔　

攝影：蔡浩文　

場地提供：PitStop Fitness　

查詢電話：2154 4281