Nissan NOTE前衞慳油配

日產（Nissan）NOTE剛進行了Facelift，廠方稱之為2017版，改動集中在外觀上，並換上雙色座椅及平底軚盤，感覺更年輕化。向來，車廂空間及燃油效率都是NOTE的賣點，改款後亦得以延續，座艙依然寬敞，還具備每公升油行24.8km的超低油耗表現，慳油到你唔信！

Nissan NOTE
售價：$175,800

動感元素外形年輕

屬B-segment的Nissan NOTE，車廂空間在同級車嚟講都真係大得幾誇張，內籠長達2,065mm，就算駕駛者有6呎高，後排乘客的膝部空間仍有成隻手掌位剩，市場上好多級別比NOTE高的Hatchback、SUV都唔係佢嗰皮，翹腳坐都仲得，唔到你唔服。新NOTE的外觀增添不少生氣，除咗車色增添至12種外，頭、尾泵把亦換上新設計，配合家族式的「V-motion」蜂巢鬼面罩、投射式頭燈、Z形LED尾燈及電鍍門邊手把，糅合動感與前衞元素，與前款車型相比，看上去後生得多。

軚盤用上平底設計，為駕駛席帶來更鬆動的大腿空間。

錶板由三圓形組成，行車資訊清晰易讀。

出車已標配全自動恒溫冷氣系統，輕易便可調節車廂溫度。

內籠寬敞尾箱闊落

NOTE的車長僅4.1m，空間卻出乎意料的寬敞，用落仲十分User-friendly，好似後門咁，開啟角度可大至幾近直角，對於行動不便的長者、孕婦而言，上落車都輕鬆啲啦。新NOTE的年輕化設計亦延伸至車內，座椅及門壁都用上雙色配搭，軚盤亦換上運動化的三幅式平底設計，除加設了弧形手握位，手感比以前更好外，D形的平底設計也為駕駛席帶來更鬆動的大腿空間，停燈位時可稍為伸展一下，有助減少開長途車出現的腳部疲勞。此外，尾箱空間亦唔係只夠擺個膠箱嗰隻，實情是行李篋及嬰兒車都放得落，若放平後座更可放置3個9吋直徑的高爾夫球袋，係咪估佢唔到呢？

啟用ECO模式可進一步節省油耗。

座椅採用雙色布料，更見時尚感。

乘坐空間非常闊落，在同級中有相當優勢。

起步爽快性價比高

動力配置上，新NOTE依舊採用三缸12-Valve Supercharger引擎，容積為1.2公升，Advanced XTRONIC CVT自動波箱為標準配備，開起來比預期靜，起步都幾爽吓，快就肯定稱不上，但頭段表現真係唔錯，唔使猛踩油門都好夠力。油耗表現亦令人驚訝，根據日本JC08模式，新NOTE每公升油可行駛24.8km，計落只需$0.6/km，養車成本都低啲。現時，代理已將智能停車熄匙系統（ISS）、ECO節能行車模式、全自動恒溫冷氣及Keyless Go無匙系統等列為標準配備，仲有6年原廠保用，約$17萬幾的車價都幾有吸引力。

門邊把手換上電鍍款式，看上去更添活力。	尾箱空間不錯，足夠擺放嬰兒車。	擎容積只有1.2公升，起步加速仍爽快。
無段變速波箱運作平順，帶來舒適乘坐感。	新NOTE外形年輕化，更具吸引力。