養生法寶滋補燉湯

時令湯品　滋潤養生

過時過節與親友聚首，聽得最多的並不是「幾時結婚」或者「有仔趁嫩生」，而是「點解殘咗咁多？」與其自怨自艾，不如諗方法急救暗啞肌膚。除了勤力敷Mask，飲多兩碗滋潤湯水一樣有效。位於上環的「球哥燉湯」每日供應10多款時令湯水，聽講很受OL歡迎，連在銅鑼灣、灣仔上班的打工仔都透過外賣程式訂餐，確保日日OT都有湯水到肚，今日一於看看球哥的出品有幾吸引。

口味眾多　功效廣泛

小店開業3年，球哥一直堅持為客人帶來家常風味的健康美食，無論燉湯或小菜全部都不加味精，口味偏向清淡而又有家的味道。為了保持質素，他堅持每朝一早回舖頭煲湯，燉4至6小時剛好趕及午市；午市後再燉第二輪湯水，讓客人時刻都飲到新鮮入味的靚湯。

燉湯款式相當多元化，喜歡清甜滋潤湯水，可以試試木瓜雪耳排骨燉湯、無花果排骨燉湯、椰子栗子雞燉湯、蘋果雪耳排骨燉湯等加入生果燉製的湯水；金銀菜陳腎排骨燉湯、西洋菜豬肺湯同樣清甜滋補；濃味之選則有花旗參雞燉湯、白胡椒豬肚燉湯；至於新推出的花膠螺頭雞燉湯更被視為「美顏特效藥」。

野菌燉湯 $50 新口味燉湯之一，材料包括牛肝菌、乾松茸、猴頭菇、松茸菇等野菌，全素製作清甜養生，亦有很高的營養價值。	蘋果雪耳排骨燉湯 $46 用新西蘭蘋果、雪梨、雪耳及排骨燉製，既有滋補養顏功效，味道又清甜得像糖水，很受女士及小朋友歡迎。	小店沒有華貴裝潢，但環境乾淨企理，在這兒品嘗家常小菜也是一種享受。

家常小菜　健康抵食

小店的家常小菜一樣有驚喜，即叫即製的小炒、蒸餸、籠仔蒸飯選擇多達數十款，最貴的籠仔蒜蓉海蝦蒸飯亦只是$124，其他菜式也只是幾十蚊就有交易。想食得更划算可以點叫午市燉湯套餐，一款餸、一盅燉湯、一碟時菜再加一碗飯亦只是$78；正所謂「You are what you eat」，食得健康有「營」，皮膚靚體質好，「中女三寶」自然派不上用場。

籠仔蒜蓉海蝦蒸飯 $124 菜式看似簡單其實頗花工夫製作，師傅先以蒜蓉炒香海蝦和米飯，再用荷葉墊底放在籠內蒸熟，荷葉香氣夾雜着蒜蓉蝦的鮮味，分量足夠二人享用。	欖角肉排 $78 老幼咸宜的招牌小炒，將新鮮肉排醃製後剁碎，伴以欖角並加入蜜糖調味，炒製後肉質鬆化且肉汁豐富，鹹甜兼備相當開胃。	蟹肉扒菜苗 $82 很受歡迎的家常小菜，馬來西亞蟹肉味道鮮甜，與爽甜的溫室菜苗同煮，味道清淡可口，配白飯燉湯已是一頓豐富晚餐。
鮮腐竹魚湯浸時蔬 $82 這道餐牌沒有的神秘菜式是球哥推介，不少熟客試過也讚不絕口。用鮮甜魚湯浸着芥蘭與腍滑腐竹，可以一次過品嘗濃郁的鮮魚與蔬菜滋味。	果皮蒜蓉蒸斑頭腩 $138 嚴選口感爽滑的龍躉斑頭腩，加蒜蓉蒸熟分外香口，另一特色是以新會果皮調味，令家常小菜多添一份甘香滋味。	瑤柱薑米蛋炒飯 $78 最適合在乍暖還寒季節享用的炒飯，用切成白米般大小的薑粒、雞蛋和瑤柱炒製而成，乾身香口又不油膩，更有暖胃之效。

撰文：楊雅菁　

攝影：盧展程

地址：上環蘇杭街88號地下

查詢電話：2111 0904