應節手機Apps 迎雞接福
話咁快來到雞年，無論商場店舖、大街小巷甚至家居布置都充滿新年氣氛。想拜年時更熱鬧？梗係要為手機添置一些應節工具，以下就有雞年揮春、遊戲、相框等免費Apps，讓各位雞年旺上加旺。
《Pogo Chick》雀躍歡騰
想喺新年玩些節奏較快嘅遊戲，《Pogo Chick》一定啱各位。玩家要控制一隻踩住彈彈棍嘅雞仔，跨越版圖上不同障礙。儲夠道具之後，仲可以幫雞仔變裝戴草帽、盔甲甚至皇冠等。
《宇宙最強揮春》祝福語句
齋聽個App名就已經勁有氣勢，《宇宙最強揮春》由港人開發，提供一系列揮春樣本，大家可以揀選揮春主題、字體、顏色、字句等，甚至隨意寫上貼心祝賀語句，還備有「組合揮春」功能，能夠經WhatsApp等傳送畀親朋好友。
《Chinese New Year Frames 2017》喜慶相框
新年同親朋好友拜年，總唔少得影靚相，《Chinese New Year Frames 2017》內置一系列傳統中國新年相框，用家可為合照加入雞年、喜慶等裝飾，另可加入文字等，最啱新年團拜合照後即刻嚟個簡單後製。
《最萌福語》賀年貼圖
嫌用文字寫祝賀語句太單調，呢款《最萌福語》提供大量新年貼圖，揮春、利是等任君選擇，而且貼圖設計得意又可愛。不過輸出語句只可經《iMessage》使用，Android用家唔恨得咁多喇！
撰文、部分攝影：林子聰