芬蘭Uunisaari島 0℃洗邋遢

近日網上流傳外國的小朋友在嚴冬下游泳之片段，港爸港媽們見到，即時覺得西方人乜都夠膽死，小孩真係陰功豬！

實情係，冬泳是不少歐洲國家的傳統，大小朋友都會在嚴冬落水。適逢今日年廿八，來到芬蘭Uunisaari島，索性試一次正宗芬蘭浴（唔係香港嗰隻）。桑拿完後，於0℃的嚴寒下游冰湖，再上岸歎番個戶外Jacuzzi，一次過試勻3個方法來洗淨全身迎接雞年，嚟緊肯定有運行！

餐廳享受芬蘭浴

如你對芬蘭首都赫爾辛基（Helsinki）有所認識，應該對其周邊的島嶼不陌生，最出名的芬蘭堡（Suomenlinna），貴為世遺兼有童心未泯的玩具博物館；Sirpalesaari島則有無敵海景餐廳；而毗鄰的Uunisaari島，則被譽為最有「芬蘭味」的小島，皆因此島有傳統芬蘭浴讓你享受，話說好多芬蘭家庭都有小型的自家桑拿房，因此公共桑拿浴場不算多，而芬蘭人卻喜歡在桑拿房內Gathering，想約埋一班Friend子去浸芬蘭浴，屋企個桑拿房又太細？Uunisaari島是不二之選。小島一年四季開放，由赫爾辛基的Kaivopuisto公園乘船只需3分鐘，猛男導遊Anssi帶着我們一行10人，第1站就是去全島唯一的餐廳Uunisaari Restaurant，不過不是去飽餐一頓，事關餐廳同時提供歎個芬蘭浴的功能。同港人心目中的芬蘭浴應該有點出入，當地傳統需要一紮樺樹葉（Finnish Vihta）來幫助，先用該葉沾少許凍水拍打全身，以刺激皮膚及加快新陳代謝，之後同浸溫泉一樣，洗個澡後才可正式享受芬蘭浴。

冬天時分湖面結冰，只可以橋代船，步行約10分鐘即到Uunisaari島。	冬天時芬蘭海灣都變成雪地，唔使掃興，掘個窿一樣可以游冬泳。	餐廳前身為工廠，後經改建變成現在歎芬蘭浴的必到之地。
西人真係強壯啲，只用毛巾包住就夠暖，而我落水前仲係着住件大褸。	傳統的桑拿房，室溫約在80℃至100℃之間，享受完後要即時跳入0℃冰湖，鍛煉意志呀。

0℃落水高難度

傳統芬蘭浴的步驟是先桑拿「乾蒸」5至20分鐘，之後便會直接跳入冰湖降溫！0℃落水，傻的嗎？Anssi話冰火二重奏才是傳統。冬泳的芬蘭文「Avantouinti」，意即「冰上掘個窿」，芬蘭的冬季時分，湖面都結了冰，想落水惟有掘個洞，因而得名。桑拿加冬泳係配套，幾乎是每個國民冬天必做的習俗，遊客大都怕凍，一般只會歎桑拿而放棄冬泳，但兩者其實不可分割。對於非冬泳選手來說，游冰湖更重要的是助你擁有強健體魄，據說游冬泳可促進血液循環，增強心肺功能，仲可以紓緩肌肉痠痛。平時20℃以上我才會在戶外游水，現在0℃落水，感覺會係點？Anssi建議我們不要慢慢落水，更不要試水溫，因為試完你應該唔敢落，最好不要猶豫一口氣落水，不停地游，務求要身體Keep住有熱力才不會凍。

入鄉隨俗的我，幻想可唔可以輕輕鬆鬆鄧梓峰咁游冰湖，最後都係好輕鬆，只係游了10秒咁大把，失禮晒。冬泳過後，則可泡在暖笠笠的Jacuzzi，身體也有一份難得的舒暢，加上有無敵海灣美景相伴，確係難得的濕身體驗。

導遊Anssi率先落水，上水後仲話其實唔凍喎。

即使到訪當日是雨天，都無阻一班本地人享受Jacuzzi的雅興。

Uunisaari島同赫爾辛基只是一橋之隔，無論坐船定行路都極之方便。

Uunisaari Restaurant

地址：Uunisaari Island, 00140 Helsinki

桑拿開放時間：9:30am~3:00pm

桑拿收費：€8（約HK$66.4）起

網址：www.uunisaari.com

四隻腳遊首都

享受完「冰火二重奏」，不如試埋另一個健康運動——北歐式健走（Nordic Walking）。此運動始於芬蘭，原本是方便滑雪運動員在非冬季日子，可以利用雪杖繼續練習行走及保持體力。究竟呢個要兩支棍、手腳並用的健走法，同普通行路有咩分別？Anssi解釋，除了促進心肺功能，健走法消耗的熱量比一般走路多約20%，而且雙手一前一後推動健走杖的動作，可活動到全身肌肉，強化背部、腹部、腿部和手臂肌肉，難怪德國、奧地利、美國等國家，愈來愈多人進行此運動。我們參加Happy Guide Helsinki公司安排的精華遊，以北歐式健走法遊首都，有多條路線可選擇，我們最後選了由當代美術館Kiasma出發，途經參議院廣場（Senate Square）、Esplanadi公園、聖母安息主教座堂（Uspenskin Katedraali）、Market Square等。歷時2小時的北歐式健走之旅，除了一次過欣賞到赫爾辛基多個著名景點外，仲成功燃燒脂肪，絕對一石二鳥。

看似有點奇特的北歐式健走，實情比普通步行同慢跑都有益，難怪芬蘭超過10%國民每星期都要行一行舒筋活絡。	一般健走杖只有150克重，卻有足夠的負重力同彈性，令使用者得到緩衝和借力。	冬季下，光禿禿的樹木令Esplanadi公園感覺異常淒美。
位於參議院廣場的赫爾辛基主教座堂（Helsinki Cathedral），建於1830年，芬蘭獨立前的名稱為St Nicholas' Church，獨立後才改為現在的名字。	行走路線經過Market Square，無論市集還是賣藝的人，一樣吸引。	彷彿每個西方城市都有一條情人橋，赫爾辛基都有，位於Market Square附近。