5.7吋PRO 6 Plus 拜年搶「鏡」

農曆新年就到，食飯打牌少不免同親朋戚友自拍一番。Meizu（魅族）近日發表5.7吋PRO 6 Plus智能手機就標榜影相功能，前置ArcSoft鏡頭支援十級美顏功能，後置1,200萬像素鏡頭則加入10 LED環形閃光燈，無論自拍或影人都咁搶鏡，係時候儲利是錢入手啦！

500萬像素前置鏡頭備有F2.0大光圈，加埋ArcSoft智能美顏，女士必Like！

機身輕薄唔刮手

PRO 6 Plus採用微弧曲線機身設計，表面經過30道工序及150小時細緻雕琢，摸上手順滑唔刮手，而且厚度只有7.3mm，纖薄誘人。顏色則有香檳金及深空灰兩色，可惜發布會現場只有灰色一款供試玩，感覺略嫌大路，相信金色會更搶眼應節。屏幕用上5.7吋AMOLED材質，支援2,560×1,440解像度、10,000:1對比度及518ppi像素密度。試播《Power Rangers》全高清預告片，雖然屏幕帶有AMOLED一貫味精感覺，但亮度十足且鮮艷奪目，配以ES9018K2M解碼晶片有助提升音色，用來睇片一流。

十級美顏夠自然

新年例必要影全家福，其主鏡頭升級使用IMX386 CMOS感光元件，備有1,200萬像素並內置四軸光學防震，配以10 LED環形閃光燈；前置ArcSoft鏡頭亦達500萬像素、F2.0大光圈，規格勝過唔少DC仔，影相一定唔失禮。女生至愛的美顏模式包括美瞳、瘦臉、磨皮加美白全部有十級調校，功能齊全。Model試玩後話美顏效果自然，冇其他自拍神器影出嚟咁假！另支援近期大熱的GIF動態相片，隔空拜年更傳神！

售價：$3,999	機背主鏡頭備有1,200萬像素，配以10 LED環形閃光燈，火力十足！	機身厚度只有7.3mm，拍埋個一毫子就知有幾薄。
可插入雙SIM卡，可惜加唔到microSD記憶卡擴充容量。	Home掣植入指紋識別器，解鎖過程只需0.15秒。	採用USB Type-C介面，旁邊備有喇叭和耳機孔。

0.15秒指紋解鎖

效能方面，新機升呢使用Samsung Exynos 8890八核心處理器，並內置4GB RAM及128GB ROM，撥頁開Apps均見流暢，《AnTuTu》跑分有112,597分，屬市場中上水平。特別一提，此機的Home鍵植入指紋識別器，解鎖過程只需0.15秒，小記實測時一按即進入主頁，果然爽快！美中不足是原定加入的心率測量功能暫時未有提供，廠方指日後要透過韌體更新才可玩到，用家要畀啲耐性了！

5.7吋AMOLED屏幕亮度夠光而且鮮艷，用來試睇《Power Rangers》全高清Trailer，黑位層次分明。	提供低功耗、極限及自訂等多個省電模式，切合不同需要。	美顏Mode支援美瞳、瘦臉、磨皮加美白，效果自然。
支援近期大熱的GIF動態相片，隔空拜年更有現場氣氛！	備有電筒、鏡子、指南針、水平儀、間尺等實用工具。	《AnTuTu》跑分有112,597分，表現中上。