S6四軸摺機空中狙擊

無人機愈出愈細部，仲玩埋摺疊式設計，真係放落背囊就可以帶出街。不過單單摺細已無甚睇頭，新一代Wingsland S6四軸無人機，除了拍到高質嘅4K影片，最過癮係可加裝不同配件，大玩空中對戰、傳情達意、夜間照明等，玩味爆燈。

26.8mm超薄機身

S6的軸臂用上摺疊式設計，收納後的面積同部4.7吋iPhone差唔多大，而且厚度僅26.8mm，其他摺機都未必做到咁薄，而且連埋電池只重230g，帶出去玩全無負擔。配置亦算齊全，內建六軸陀螺儀，底部仲有光流感應器、紅外線和超聲波感應器，以便在室內或者冇GPS嘅環境下懸停和定高。操控方面則主要靠手機遙控，用家只需利用Wi-Fi連接《Wingsland Fly》App即可起飛，仲可以揀虛擬操控桿或體感操作；還內建智能模式，有齊一鍵起飛/降落、自動跟隨、環繞拍攝、自動空翻等功能。

4K@30p拍片畫質

雖然摺疊無人機嘅種類好多，但唔係部部都有4K拍片質素，市面上暫時只有DJI Mavic Pro、Yuneec Breeze等支援，S6亦跟住潮流支援4K@30p、1,080@60p畫質，亦影到1,300萬像素相片。至於鏡頭具備117度視野，唔算得上特別Wide，而且冇得調校拍攝角度，但勝在支援三軸電子防震，所以拍片尚算穩定。

LED表情板能夠顯示手機輸入嘅字句或圖像，用嚟冧女一流。

探射燈輸出夠強，就算日間都有不俗光度，而且可加入閃燈效果。

配件需要另購，左至右為炮台（售價：$250）、探射燈（售價：$150）、LED表情板（售價：$200）。

配件需要另購，左至右為炮台（售價：$250）、探射燈（售價：$150）、LED表情板（售價：$200）。

配件玩法有趣

新機最大賣點是頂部設有電子接點，讓玩家額外加建配件，現提供炮台、LED表情板、探射燈等供另購，主要靠App去控制。當中炮台實為BB彈發射器，可填裝最多6枚BB彈畀大家玩空中狙擊。而LED表情板嘅用法亦算簡單，先喺手機App輸入文字或圖案，表情板就會顯示相關字句，用嚟冧女肯定加分。適用於夜間嘅探射燈，唔單止可以用嚟照明，亦能夠使用閃燈效果。不過提提大家，S6的1,400mAh電池續航力只有10分鐘左右，若加埋配件更加耗電，建議買多枚電池備用。

S6摺疊後嘅面積同部4.7吋iPhone相若，以便隨身攜帶。	鏡頭最高能拍到4K@30p影片和1,300萬像素相片，不過冇得調校鏡頭角度。	除咗軸臂可以摺埋之外，螺旋槳亦能屈曲收納。
1,400mAh電池大約飛到10分鐘左右，建議買多枚後備電池。	為咗能夠喺唔同環境定高，底部特設光流感應器、紅外線和超聲波感應器。	機旁設有USB插口和microSD卡槽。
無人機主要靠《Wingsland Fly》App控制，支援體感操作。	拍片支援4K（3,840×2,160）解像度，而且提供每秒30格流暢度。	試片區呢幾日天空嘅能見度較低，令遠景有點白濛濛，幸好S6擁有4K畫質，成像都算唔錯，連海中嘅小艇都睇得清清楚楚，色彩忠實呈現。