人在外地，收到編輯電郵通知，說副刊專欄要結束了。
憶起細細個開始寫報章專欄，匆匆十數年，多年來曾經被一位又一位前輩編輯熱心提攜指正，告訴我專欄應該怎麼寫，要像朋友般跟讀者建立關係，語氣要像老朋友般親切，切忌扮嘢懶叻，這些我都銘記在心，念念未忘……
沒想到，前輩一直用心守護傳承嘅副刊專欄變成明日黃花，自己唔覺唔覺竟然成為最後一代專欄作家，只覺羞愧又無奈。斷斷續續，這專欄由《太陽報》開始至今，輾轉十幾年，打從我大學畢業冇耐開始寫，靠這份固定收入，我先畀到家用，還到「關窿」，支持到生活，寫到《無城有愛》，寫到我兩次進出電視台，至親離世，人生順逆起跌，都畀我改頭換面，包裝成一塊塊濃湯寶似的500字小磚塊，側面記下了我人生的喜怒哀樂，大家咁多年嚟好鍾意睇嘅《路中拾遺》、《原來我沒有生活》系列、《人生要閃閃亮亮》、《一路走來》同《空轉人生》系列，其實全部都係嚟自呢個小小嘅專欄……
寫咗咁多年，都有份感情喺度，尤其對於我呢啲冇固定工作同收入嘅Freelancer嚟講，呢個十幾年嘅專欄，更加好似個船錨咁，一直對我的身心起到穩定的作用……
離別自是萬般不捨，卻也只能笑着面對，至少每篇每字，我沒有愧對。紙媒黃昏，前路幽暗未明，低處永遠未算低，只感激沿途每位讀者朋友與編輯的包容鼓勵。惟有疊埋心水，全力做KOL算，哈哈。
最後一篇，立此存照，路直路彎，莫失莫忘，且行且珍惜，惟盼山窮水復，後會有期。
網址：www.facebook.com/yihingong