大棠捕「楓」四式影紅葉

每年12月尾至翌年1月，都係本地紅葉旺季，想拍攝「楓」之美，首選必定係元朗大棠嘅楓香林，但入到去經常人頭湧湧，咁多棵樹都唔知點影先至靚。唔想如入寶山空手而回，一於請自然風光及社會紀實攝影師Laurence Lai，醒大家幾招紅葉拍攝技巧。

如果唔想同人逼，Laurence建議喺6:30am~9:00am到達大棠，此時的光線偏向柔和，令相片反差冇咁大。

第一式：長鏡特寫避開人潮

香港賞楓嘅地方唔多，當中最靚兼最多人到訪嘅肯定係元朗大棠，近期乘着紅葉綻放，無論假日抑或閒日都逼滿人，攝影師Laurence表示：「如果唔想張張相都有人入鏡，破壞紅葉美感和構圖，可選擇用長鏡以低角度拍攝特寫，由於楓香樹嘅樹幹較高，一般需要用到200mm或以上焦距才影到特寫。而背光之下能夠透出紅葉嘅葉脈，特別有意境。不過要注意應使用重點測光，以樹葉為測光目標，避免曝光錯誤等問題。」Laurence補充，建議喺6:30am~9:00am呢段時間入去，一來人潮比下午少，二來光線較為柔和。

第二式：偏光鏡凸顯自然色彩

喺數碼年代，要將紅葉變得鮮艷絕對唔難，只要用軟件撳個掣就做到；若然技術高超的話，甚至可將綠葉變紅。不過Laurence就唔主張過分後製，要影冇「味精」嘅紅葉靚相，他建議：「若然以天空作背景，要展現紅葉色彩，可於鏡頭上加裝偏光鏡（C-PL Filter），偏光鏡唔單止可濾走光線中嘅偏振光，亦能減少空氣中嘅紫外線及散射光，利用光學原理凸顯色彩和減低反差，影出嚟嘅紅葉色彩更加豐富。」

從樹底下以低角度拍攝，既可避開人群入鏡，亦能凸顯楓香樹氣勢。

利用背光嘅採光法，能夠透出紅葉的葉脈細節。

不妨以綠葉或藍天作為背景，透過顏色去突出紅葉色彩，亦可加裝偏光鏡（C-PL Filter），提升鮮艷度。

不妨以綠葉或藍天作為背景，透過顏色去突出紅葉色彩，亦可加裝偏光鏡（C-PL Filter），提升鮮艷度。

第三式：黃金分割構圖美感

影紅葉除咗講求色彩，美感都相當重要，最基本係從構圖方面入手，Laurence解釋：「拍攝時唔一定將紅葉放喺正中間位置，可利用黃金分割構圖，將主體放喺一側，觀眾睇相時就有聯想嘅空間。另外，不妨嘗試對比構圖法，例如以前後、遠近、大小、疏密嘅手法表現紅葉，效果相當有趣。」他建議唔好每張相都用特寫拍攝，有時候應該用標準或廣角焦段影埋地貌，從而標示拍攝地點。

構圖上可嘗試以前後、疏密作對比，影出嚟嘅畫面會更有趣。

以黃金分割將主體放在一側，保留空間感令畫面更具可觀性。

第四式：反射鏡拍夢幻散景

影紅葉嘅時候快門要夠快，建議調至1/250秒以上，避免因風吹令主體畫面模糊。至於光圈就唔好開到最大，使用F5.6~F11最為理想，Laurence指出：「假如想影出夢幻作品，可使用反射鏡頭，由於鏡頭中央部分唔透光，所以影出嚟嘅散景會呈圈狀，統稱為『冬甩』效果；加上反射鏡普遍有500mm等長焦距，好適合影紅葉。」由於影紅葉經常要抬頭望上去，唔想咁辛苦可以揀高身腳架，或者有反芒設計嘅相機取景。

使用反射鏡頭拍攝，細心之下會發現背景呈現「冬甩」圈狀效果，感覺夢幻。	500mm F8 Reflex-Nikkor C反射鏡為Laurence愛鏡之一，雖然近年已停產，但二手店或網站仍有不少人放售，二手價約$2,000~$4,000。	Nikon D500內置DX格式感光元件，能夠將鏡頭焦距乘上1.5倍，有利特寫紅葉，加上機背採用3.2吋可揭式屏幕方便取景。售價：$16,380（a）
Gitzo Systematic系列腳架提供3、4、5號選擇，最長嗰支可升到278cm咁高，而且腳架用上Carbon eXact碳纖維腳管，夠晒穩定。售價：$8,190~$14,490（b）	Nikkor 200~500mm F5.6E ED VR遠攝變焦鏡頭嘅焦距夠闊，從樹底影紅葉冇難度，雖然最大光圈只有F5.6，但已足夠日間使用。售價：$10,980（a）